Superliqanın iki klubunda yeni təyinat reallaşıb. 16 illik fasilədən sonra elitaya vəsiqə qazanan “Kocaelispor” və Arda Turan ayrılandan sonra başsız qalan “Eyüpspor” yeni məşqçisinə qovuşub.

"Football-plus.az" xəbər verir ki, Kocaeli təmsilçisi Səlcuk İnanla “1+1” illik müqavilə imzalandığını açıqlayıb.

40 yaşlı İnan sonuncu dəfə ötən ilin martından bu ilin mayına qədər “Qaziantep”i çalışdırmışdı. “Eyüpspor”un seçimini isə sürpriz adlandırmaq olar. Çünki İstanbul təmsilçisi müstəqil məşqçi kimi heç bir təcrübəsi olmayan Səlcuk Şahini baş məşqçi postuna gətirib.

“Eyüpspor”, bilindiyi kimi, geridə qoyduğumuz mövsümdə tarixində ilk dəfə elitada çıxış etmiş və Arda Turanın rəhbərliyi altında 6-cı yeri tutmaqla futbol ictimaiyyətini yaxşı mənada təəccübləndirmişdi. Arda artıq “Şaxtyor”un məşqçisidi. 44 yaşlı Səlcuk Şahin futbolçu kimi uzun illər (2003-15) “Fənərbaxça”nın şərəfini qoruması ilə populyarlıq qazanmışdı. “Fənər”dən ayrılandan sonra “Vil”, “Gənclərbirliyi”, “Göztəpə” və “Bursaspor”da forma geyərək 2020-ci ildə karyerasını bitirən Şahin elə həmin il “Fənər”də ələqələndirici kimi çalışmağa başladı. Daha sonra “İstanbul BŞ”də Əmrə Belözoğlunun köməkçisi kimi çalışan Şahin 2023-dən bəri Türkiyə yığmasında Vinçentso Montellanın köməkçisi vəzifəsini icra edirdi.

“Eyüpspor”dan verilən rəsmi açıqlamada Şahinə icazə verdiklərinə görə həm Montellaya, həm də Türkiyə Futbol Federasiyasına xüsusi təşəkkür bildirilib. Bu mütəxəssis hazırda yığma komanda ilə birlikdə Amerikadadı. “Ay-ulduzlular” vətənə qayıdandan sonra Şahin üçün klubun bazasında imza mərasimi təşkil olunacaq.