Futbolçu kimi uzun illər Avropada top qovmuş, ''Atletiko'' və ''Barselona'' kimi nəhənglərin şərəfini qorumuş Arda Turan məşqçi kimi də Avropada işləməyə çox yaxındı.

Məlum olduğu kimi Arda 2023-dən bu yana ''Eyüpspor''u çalışdırır. Bu klubu tarixində ilk dəfə elitaya yüksəldən 38 yaşlı mütəxəssis bu mövsüm ''Eyüpspor''la avrokuboklara vəsiqə uğrunda mübarizə aparmaqla diqqət çəkir.

Ardaya uzun müddətdi, maraq göstərən ''Şaxtyor'' bu mövzuda real və ciddi addımlar atmağa başlayıb. Ukrayna çempionatında bu mövsümü istədiyi kimi keçirə bilməyən və əzəli rəqibi Kiyev ''Dinamo''sundan çox geri qalan Donetsk təmsilçisi əvvəlki qüdrətini qaytarmaq istəyir. ''Şaxtyor''un Ardaya maraq göstərməsi ilə bağlı xəbərlər hələ yanvardan mövcuddu. Amma həmin vaxt gənc türkiyəli çalışdırıcı mövsümü ''Eyüpspor''da tamamlamaq istədiyi üçün danışıqlar aparmağa ehtiyac görməmişdi. İndi isə tərəflər arasında artıq danışıqlar başlayıb.

Türkiyə mətbuatının yazdığına inansaq, bir neçə gün öncə Arda Londonda ''Şaxtyor'' rəsmiləri ilə görüş keçirib. İkinci görüş isə İstanbulda baş tutub. Çünki ''Şaxtyor''un idman direktoru Dario Srna hazırda İstanbuldadı. Ardanın klubunu dəyişəcəyini göstərən daha bir məqam odu ki, bu məşqçi hələ də ''Eyüpspor''la yeni müqavilə imzalamayıb.

Onun klubla müqaviləsinin müddəti iyunun 30-da başa çatacaq. ''Eyüpspor'' hazırda 33 oyuna topladığı 50 xalla 6-cı pillədə qərarlaşıb.