Yeni mövsümdə Türkiyə çempionatında oynamağa qazanan və 16 illik həsrətə son qoyan ''Kocaelispor''un yeni baş məşqçisinin adına aydınlıq gəlib.

1-ci liqada mövsümə Ərtuğrul Sağlamın başçılığı altında başlayan, amma elitaya vəsiqəni İsmət Taşdəmirin başçılığı altında əldə edən, sonda bu məşqçi ilə də vidalaşan Kocaeli təmsilçisi Səlcuk İnanla anlaşıb. 40 yaşlı mütəxəssis ilə ''1+1'' illik müqavilə imzalanıb.

Futbolçu kimi uzun illər ''Qalatasaray''da, eləcə də Türkiyə yığmasında forma geyən Səlcuk İnan məşqçi karyerasına ''Cim-Bom''da Fatih Terimin köməkçisi kimi start vermişdi.

İstanbul nəhəngindən ayrıldıqdan sonra o, müstəqil məşqçi kimi ''Kasımpaşa'' və son olaraq ''Qaziantep''də çalışmışdı. Antep təmsilçisi ötən ilin martından bu ilin mayına qədər bu məşqçi ilə superliqada keçirdiyi 43 oyundan 17 qələbə, 7 heç-heçə, 19 məğlubiyyətlə ayrılmışdı.