Arda Turan ''Eyüpspor''dan rəsmən ayrıldı
Türkiyə çempionatının debütantı ''Eyüpspor'' üçün mövsüm başa çatdı. Çünki bu komandanın gələn tur oyunu yoxdu. Arda Turanın çalışdırdığı ''Eyüpspor'' bu tur Əmrə Belözoğlunun çalışdırdığı ''Antalyaspor''u 2:1 məğlub etdi.
Tarixində ilk dəfə elitada oynayan İstanbul təmsilçisi mövsümü 6-cı pillədə tamamlamış oldu. Matçın ardından Arda Turan gözlənilən açıqlamanı verərək ''Eyüpspor''dan ayrıldığını bildirdi:
''Bu gün ''Eyüpspor''un baş məşqçisi qismində son oyunumu keçirdim. Prezident və futbolçular başda olmaqla hər kəsə təşəkkür edirəm. Prezident önümü açaraq ayrılmağıma mane olmadı. 3-4 təklif arasından seçim edəcəm. 10 gün dincəldikdən sonra qərarımı verəcəm. Həm duyğusal, həm də qürurluyam. Böyük ehtimalla gələn mövsüm vətəndən kənarda çalışacam. Amma ölkə bəlli deyil. ''Eyüpspor''un başında 84 oyuna çıxdım. İndi isə gözəl şəkildə vidalaşıram. Burda hər zaman baxımlı oyun sərgiləməyə çalışdıq. Hakimlikdən heç vaxt şikayətlənmədik. Xoşbəxt və qürurlu şəkildə mövsümü tamamlayırıq''.
Arda Turan rəsmi olaraq yeni klubunu açıqlamasa da, onun gələn mövsüm harda işləyəcəyi çoxdan bəllidi. 38 yaşlı mütəxəssis hələ 2 həftə öncə ''Şaxtyor''la anlaşma əldə edib. Onun illik 2 milyon avro qazanacağı bildirilir. Digər detallar rəsmi təyinatdan sonra bəlli olacaq. ''Şaxtyor'' da dünən Marino Puşiç ilə rəsmən yollarını ayırdı. Qeyd edək ki, Donetsk klubu yeni mövsümdə XXI əsrdə ilk dəfə Çempionlar Liqasında iştirak etməyəcək.
Ümumiyətlə, bu klub son 29 ildə ilk dəfə Ukrayna çempionatında mövsümü ilk ''2-lik''də bitirə bilmədi. Ardaya gəlincə, o, ''Eyüpspor''un başına hələ 2023-ün aprelində keçmişdi. İlk cəhddən komandanı elitaya daşımaq mümkün olmasa da, Arda ilk tam mövsümündə bu hədəfə çatmağı bacardı. Elitadakı ilk mövsümdə isə o, kifayət qədər yaxşı təsir bağışlayaraq komandası ilə 6-cı pilləni tutdu.
Ümumilikdə ''Eyüpspor'' Ardanın başçılığı altında keçirdiyi 84 rəsmi oyundan 45 qələbə, 14 heç-heçə, 25 məğlubiyyətlə ayrılmış oldu.
Digər xəbərlər
