Türkiyə futbolunda Nuri Şahin, Əmrə Belözoğlu, Volkan Dəmirəl kimi yeni nəsil gənc məşqçilərə daha bir isim əlavə olunub.

Football-plus.az xəbər verir ki, söhbət “Trabzonspor” və “Qalatasaray”ın sabiq üzvü Səlcuk İnandan gedir. 37 yaşlı Səlcuk superliqa təmsilçisi “Kasımpaşa”nın yeni baş məşqçisi təyin olunub.

Xatırladaq ki, İnan 2020-ci ildə “Qalatasaray”da peşəkar karyerasını başa vurandan dərhal sonra bu klubun məqşçilər korpusuna daxil olaraq Fatih Terimin köməkçilərindən birinə çevrilmişdi. Bu vəzifədə təxminən ilyarım qaldıqdan sonra o da Terimlə birlikdə ayrılmalı olmuşdu. Çünki “İmperator” bu ilin yanvarında istefaya göndərilmişdi.

Beləliklə, Pro lisenziyasına malik olan gənc mütəxəssis müstəqil məşqçi kimi ilk təcrübəsini birbaşa superliqada yaşayacaq. “Kasımpaşa” İnanla 1,5 illik müqavilə imzalayıb. Səlcuk İnan klubun cari mövsümdəki 3-cü baş məşqçisi olacaq. Belə ki, İstanbul nəhəngi 2-ci turda Sami Uğurlu, 13-cü turda isə Şenol Canla yollarını ayırmışdı. Səlcuk İnan imza mərasimində ona bu fürsəti verən “Kasımpaşa” rəhbərliyinə, eləcə də onu bu sahəyə gəlməyə cəsarətləndirən Fatih Terimə təşəkkürünü bildirib. Terimi öz idealı adlandıran və onun uğurlarına yaxşı mənada həsəd apardığını deyən İnan “Kasımpaşa”nın oyunçularını yaxşı tanıdığını, eləcə də nə istədiyini gözəl bildiyini əlavə edib.