Ötən həftəsonu superliqada tur olmasa da, 1-ci liqada 29-cu turun oyunları keçirildi.

"Football-plus.az" xəbər verir ki, Arda Turanın çalışdırdığı “Eyupspor” autsayderlərdən “Altay”ı 4:1 hesabı ilə məğlub edərək elitaya vəsiqəni rəsmiləşdirdi. Bu komanda 29-cu turu 22 qələbə, 1 heç-heçə, 6 məğlubiyyətlə tamamladı. Xalını 67-yə çatdıran “Eyupspor” sona 5 tur qalmış 3-cü pillədəki “Sakaryaspor”la xal fərqini 17-yə çatdırdı. Başqa sözlə desək, mövsümü ilk iki pillədə bitirməyi rəsmiləşdirən İstanbul təsmilçisi tarixində ilk dəfə superliqaya vəsiqə qazandı. 1919-cu ildə “Eyup İdman Yurdu” adı ilə qurulan və uzun illər aşağı liqalarda çıxış edən bu klub 2019-cu ildə iş adamı Murat Özkayannın başqan seçilməsindən sonra yüksəlməyə başladı. 2020/21-də rekord – 92 xalla 2-ci liqanın qalibi olan və 37 illik fasilədən sonra 1-ci liqaya qayıdan “Eyupspor”a, göründüyü kimi, elitaya yüksəlmək üçün 3 mövsüm kifayət etdi. Murat Özkayanın həm də “Qalatasaray”ın rəsmi üzvü olduğunu da bildirək. Bu, Arda Turanın məşqçi kimi ilk təcrübəsidi. O, ötən ilin aprelindən “Eyupspor”un başındadı. Komandanın heyətində Berke Özər, Uğur Dəmirok, Ömər Bayram, Canər Ərkin, Robin Yalçın, Sinan Gümüş, Adrien Reqattin kimi superliqa təcrübəsi olan futbolçular var. 15 qolla bombardirlər yarışına başçılıq edən Canni Bruno və 14 qolla onu izləyən Ahmed Kutucu da məhz “Eyupspor”un şərəfini qoruyur. Yəni olduqca iddialı heyət quran bu kollektivin superliqaya vəsiqə qazanması sürpriz sayılmamalıdı.

Yeri gəlmişkən, bir tərəfdən Türkiyə futbolunun elitasında “Eyupspor” kimi yeni klub peyda olubsa, digər tərəfdən “Bursaspor” kimi köklü klub məhvə doğru gedir. Hazırda 2-ci liqada mübarizə aparan bu klub son turda evdə “1461 Trabzon”a 1:2 hesabıyla boyun əydi. Ardıcıl 3-cü məğlubiyyətlə üzləşən “timsahlar”ın bununla da sona 4 tur qalmış 3-cü liqaya, yəni 4-cü diviziona yuvarlanması rəsmiləşdi! Xatırladaq ki. “Bursaspor” 2009/10 mövsümündə yeni tarix yazaraq Türkiyə çempionu olmuşdu. Amma aradan keçən 14 il ərzində, göründüyü kimi, bu klub yalnız geriləməklə məşğuldu. “Bursaspor” Türkiyə futbolu tarixinə superliqada çempion olmuş və 4-cü diviziona yuvarlanmış ilk klub kimi düşdü.