İngiltərənin “Hall Siti” klubu Mahir Emrelini transfer etməkdə israrlıdı.

“Football-plus.az” xəbər verir ki, bu barədə “Hull Live” saytı məlumat yayıb.

Həmkarlarımızın iddiasına görə, komandanın yeni baş məşqçisi Sergey Yakiroviç keçidin baş tutması üçün əlindən gələni edir. Ona görə ki, xorvatiyalı mütəxəssis təcrübəli oyunçunun fərdi ustalığına bələddi və onun sayəsində komandanın hücum xəttindəki problemlərin böyük ölçüdə həll olunacağını düşünür.

Bəli, Yakiroviçlə Mahir köhnə tanışdı. Dəqiq desək, mütəxəssis Zaqreb “Dinamo”sunda çalışarkən sərəncamında olan hücumçulardan biri də bizim Emreli idi. Maraq üçün xatırladaq ki, Xorvatiya təmsilçisinin heyətində 47 matçda forma geyən həmyerlimiz 10 qolla yadda qalıb. “Hall Siti”yə gəlincə, komanda ötən mövsüm cəmi 44 qol vura bilib ki, bu, çempionşipdə ən aşağı göstəricisidi.

“Hull Live”ın xəbərinə görə, klub rəhbərliyi artıq Mahirlə danışıqlara başlayıb və onu azad agent kimi heyətə cəlb etmək istəyir. Transferin gerçəkləşməsində idman direktoru Jared Dublinlə transfer rəhbəri Martın Hodgenin də səyləri davam edir. İngiltərəli həmkarlarımız klubun Mahirə “yox” deyə bilməyəcəyi təklif irəli sürməyə hazırlaşdığını bildirir.

Xatırladaq ki, 28 yaşlı futbolçunun “Nürnberq”lə müqaviləsinin müddəti iyunun 30-da başa çatacaq.

Yeri gəlmişkən, “Hall Siti”nin rəhbəri türkiyəli iş adamı Acun Ilıcıladı. Mətbuatda onun şəxsən Emreliyə zəng etdiyi haqda bilgilər də var.

KƏNAN BAHADIR