Türkiyənin tanınmış şoumeni və ''Fənərbaxça''nın vitse-prezidenti Acun Ilıcalının sahibi olduğu ''Hall Siti'' çempionşipdə çox ağır mövsüm keçirməkdə, eləcə də fanatlarını üzməkdə davam edir.

Komanda son turda doğma meydanda ''Derbi''yə minimal hesabla boyun əydi. Bu önəmli qarşılaşmada 84-cü dəqiqədə ''Liverpul''un sabiq müdafiəçisi Nataniel Fillipsin vurduğu qol həlledici oldu. Onsuz da durumu çətin olan ''pələnglər'' bu məğlubiyyətdən sonra sona 1 tur qalmış düşmə zonasına gerilədilər! Komandanın son 5 turda cəmi 1 qələbəsi var.

Son turda ''Hall Siti'' ''Portsmut''un qonağı olacaq. ''Portsmut'' artıq gələn mövsüm üçün çempionşipdə yerini təmin edib və matça motivasiyasız çıxacaq. Amma ''Hall Siti''yə tək 3 xal kifayət etməyə bilər. Elitada qalmaq uğrunda mübarizə aparan digər klublar da xal itirməlidi.

Maraqlıdı ki, ''Hall Siti'' ötən mövsüm premyer-liqaya vəsiqə uğrunda mübarizə aparmağa imkan verən pley-off zonasının biraddımlığında idi. Komanda yalnız son turda ilk ''6-lıq''dan kənar düşmüşdü. Ona görə də bu mövsümə ''sarı-qaralar'' premyer-liqaya vəsiqə qazanmaq hədəfi ilə başlamışdılar.

Amma göründüyü kimi ''Hall Siti'' gələn mövsümə premyer-liqada yox, 3-cü divizionda başlamağa daha yaxındı.