Türkiyənin aşağı yaş qruplarından ibarət yığma komandalarında məşqçi dəyişiklikləri davam edir.

"Football-plus.az" xatırladır ki, mayın sonlarında U-21 yığmasında Gökhan Gönül ayrılmış, onu Egemen Korkmaz əvəzləmişdi.

Bu dəfə istefa xəbəri U-19 yığmasından gəlib. Bu komandanı çalışdıran Səbri Sarıoğlu vəzifəsindən ayrıldığını açıqlayıb. Futbolçu kimi uzun illər ''Qalatasaray''da forma geymiş 40 yaşlı Sarıoğlu bu vəzifəyə ötən yay gəlmişdi.

Əslində onun hələ apreldə istefası gündəmə gəlmişdi. Çünki ''Beşiktaş'' və ''Trabzonspor'' bu məşqçinin fəaliyyətindən kəsgin şəkildə narazı idi. ''Beşiktaş''ın U-19 komandasının əsas ulduzu Adnan Karahisar yığmaya dəvət almamışdı.

Bundan başqa Sarıoğlunun UEFA Gənclər Liqasında tarix yazaraq finala qədər irəliləyən ''Trabzonspor''un U-19 komandasının bu turnirdə keçirdiyi oyunlardan heç birini stadiondan izləməməsi, eləcə də bu komandadan yığmaya az futbolçu dəvət etməsi də birmənalı qarşılanmamışdı.

Göründüyü kimi 2 ay gecikməylə də olsa, gözlənilən istefa sonda baş tutdu. U-19 komandası bu məşqçi ilə keçirdiyi 12 oyunun cəmi 4-də qalib gələ bildi (4 heç-heçə, 4 məğlubiyyət).

Hələ ki, bu vəzifəyə kimin gələcəyi bilinmir. İstefaların davam edəcəyi gözlənilir. U-20 komandasında Ərdal Günəş, U-17 komandasında isə Organ Şam ilə də qarşıdakı günlərdə yollar ayrılacaq.