Acun Ilıcalının komandası ''Hall Siti'' ilə anlaşan Sergey Yakiroviçin ''Kayserispor''dan ayrıldığını xəbər vermişdik.

"Football-plus.az"ın məlumatına görə, Türkiyə klubunun baş məşqçisiz günləri çox davam etməyib.

Türkiyə mətbuatında Markus Gisdol ilə bağlı ortaya atılan iddialar təsdiqini tapıb. Kayseri təmsilçisi almaniyalı mütəxəssis ilə ikiillik anlaşma əldə olunduğunu açıqlayıb.

Daha öncə ''Hoffenhaym'', ''Köln'', ''Hamburq'', ''Lokomotiv'' kimi klublarda çalışan 55 yaşlı Gisdol Türkiyə futbolu üçün yad isim deyil. 2023/24-də o, ''Samsunspor''un başında əldə etdiyi nəticələrlə diqqət çəkərək klubu elitada saxlamağı bacarmışdı. Samsun klubu onun başçılığı altında 33 rəsmi oyundan 13 qələbə, 9 heç-heçə, 11 məğlubiyyətlə ayrılmışdı.

Maraqlıdı ki, 2024-ün yayında Gisdol öz istəyi ilə Samsun klubundan ayrıldı. Həmin vaxt onun daha iddialı bir klubda çalışmaq istədiyi qeyd edilirdi. Amma almaniyalı bu bir il ərzində işsiz qaldı və heç bir klubda işləmədi. Birillik fasilədən sonra isə o yenidən Türkiyəyə qayıtdı.