Türkiyə çempionatından növbəti istefa xəbəri var.

"Football-plus.az" xəbər verir ki, superliqa təmsilçisi ''Kayserispor'' Sergey Yakiroviç ilə yollarını ayırıb.

Bu istefanı gözləmək olardı. Düzdü, bosniyalı mütəxəssis faktiki olaraq kayserililərin xilaskarına çevrildi. O, komandanı mövsümün gedişində düşmə zonasında qəbul etsə də, rahat şəkildə elitada saxlamağı bacardı.

Amma son dönəmlərdə Yakiroviç ilə rəhbərlik arasında münasibətlər pozulmuşdu. Çünki bu məşqçi ''Kayserispor'' ilə hələ birillik müqaviləsi olmasına baxmayaraq ''Hall Siti'' ilə anlaşma əldə etmişdi. ''Kayserispor''un prezidenti isə ''Yakiroviç bundan sonra qalmaq istəsə də, onu saxlamayacağıq'' ifadəsini işlətmişdi. ''Hall Siti''nin sahibi Acun Ilıcalı bir müddət öncə verdiyi açıqlamada Yakiroviç ilə bağlı ''Kayserispor'' prezidenti ilə üzbəüz görüş keçirəcəyini bildirmişdi.

Sonra Türkiyə mətbuatında ''Hall Siti''nin bu məşqçiyə görə Kayseri təmsilçisinə təzminat ödəyəcəyi barədə xəbərlər yayıldı. Görünür, artıq bu məsələ təzminat yolu ilə həll olunub. ''Kayserispor'' Yakiroviç ilə qarşılıqlı şəkildə yolların ayrıldığını açıqlayaraq ona gələcək karyerasında uğurlar arzulayıb.

Komanda bu məşqçi ilə 17 oyundan 8 qələbə, 5 heç-heçə, 4 məğlubiyyət ilə ayrılmış oldu. 48 yaşlı mütəxəssisin ən qısa müddətdə rəsmən Acunun komandasının başına keçəcəyi gözlənilir.