Türkiyə çempionatından yenə sürpriz istefa xəbəri gəlib.

“Football-plus.az” xəbər verir ki, bu dəfə klub məşqçi ilə yox, məşqçi özü klubla vidalaşmaq qərarına gəlib. Söhbət “Samsunspor”dan gedir. Qaradəniz klubunun başında yetərincə uğurlu mövsüm keçirən Markus Gisdol son turun ardından ayrılacağını rəhbərliyə bildirib. Bu üzdən onun meneceri Türkiyəyə dəvət olunub. Gisdola Almaniyadan təkliflər var və o, bunlardan birini dəyərləndirmək niyyətindədi. Bu üzdən “Samsunspor” yeni məşqçi axtarışına başlamalı olub. Prezident Yüksəl Yıldırım “fanatlarımız narahat olmasın, Gisdoldan da güclü məşqçi gətirəcəm” açıqlamasını verib. Qeyd edək ki, ötən yay 11 illik fasilədən sonra elitaya qayıdan “Samsunspor” mövsümə Hüseyn Əroğlu ilə başlamışdı. Amma komanda ilk 8 turu 7 məğlubiyyət, 1 heç-heçə ilə tamamladığından Əroğlunun yerinə Gisdol gətirilmişdi. Təcrübəli almaniyalı mütəxəssis sonuncu pillədə qəbul etdiyi samsunluları tədricən dirçəltdi. Komanda hətta 21-ci turda səfərdə “Fənərbaxça”dan xal alaraq (1:1) çempionluq mübarizəsinə də təsir etməyi bacardı. Gisdol qarşıya qoyulan hədəfə çataraq “Samsunspor”u elitada saxladı. Onun müqaviləsinin müddəti iyunun 30-da başa çatırdı. “Samsunspor” indiyə qədər Gisdolun başçılığı altında 32 rəsmi oyundan 13 qələbə, 9 heç-heçə, 10 məğlubiyyətlə ayrılıb.