“Çətinlikdən qorxan insan deyiləm. İdman direktorumuz Fuad Çapa və başqanımız Yüksəl Yıldırım ilə söhbət etdikdən sonra çox düşünməyimə ehtiyac qalmadı. “Samsunspor”un əvvəlki oyunlarını izləyərək komandada nələri dəyişə biləcəyimi müəyyənləşdirdim. Halbuki dost-tanışlarım sona qədər də mənə “dəlilikdi, bu boyda riskin altına girmə” deyirdilər. Amma mən bu cür mübarizələri, hekayələri və riskləri sevdiyim üçün təklifi qəbul etdim. Mənim burda gördüyüm ilk iş hər kəsi birləşdirmək və əsl komanda yaratmaq oldu. Bu, uğura aparan birinci yoldu. Tam bir ailə ab-havası yaratdıq. Rəhbərlik, futbolçular, məşqçilər korpusu və buranın işçiləri də daxil olmaqla hər kəs eyni hədəfə kökləndi. Mən, sadəcə, bu uğurun bir parçasıyam. Mənim verdiyim fayda futbolçuların və ya klub işçilərinin verdiyi faydadan böyük deyil. Başqanımıza təşəkkür edirəm. Çünki ilk gündən mənə sərbəstlik verdi. Onun təkcə əsas komandaya yox, akademiyaya da ayırdığı diqqəti görəndə çox sevinirəm. Qış transfer dönəmində də rəhbərliklə ciddi müzakirələr apararaq ən faydalı oyunçuları heyətə cəlb etməyə çalışdıq. Türkiyədə hakim olmaq çox çətindi. Hətta Almaniyadakından qat-qat çətindi. Burda hakimlər daim gündəmdədi və üzərlərində böyük yük var. Mən çalışıram ki, hakimlərə yox, öz performansıma diqqəti yönəldim. Eyni zamanda burda yaşadığım müddətdə Türkiyə mədəniyyətinə də ayaq uydurmağa çalışıram. Açığı, Türkiyə çempionatının səviyyəsi məni yaxşı mənada təəccübləndirdi. Türkiyə futbolu düzgün yoldadı və hər ötən gün inkişaf edir. Bura gələrkən bu qədər çətin olacağını gözləmirdim. İddialılardan başqa da çox çətin rəqiblər var. Məsələn, onlardan biri “Antalyaspor”du. Antalya səfərində hər kəs çətinlik çəkir. Türkiyə yığması da əla futbol sərgiləyir. Bu cür şəkildə gənc oyunçuların önə çıxmasına yardım edən bir sistemlə oynamaqda davam etsələr, birmənalı şəkildə Türkiyə futbolu gələcək illərdə adından daha çox söz etdirəcək”.