Türkiyə çempionatında məşqçi istefalarının ardı-arası kəsilmir.

"Football-plus.az" xəbər verir ki, mövsüm belə desək, orta hesabla hər tura bir istefa tempi ilə davam edir. Vəzifəsindən ayrılmaq məcburiyyətində qalan son isim “Pendikspor”un çalışdırıcısı Osman Özköylüdü. Debütant “Pendikspor” 8 turdan sonra “İstanbulspor” və “Samsunspor” ilə birlikdə hesabında qələbə olmayan 3 komandadan biridi. İstanbul təmsilçisi son turda öz meydanında “Sivasspor”a 2:3 hesabıyla boyun əydi. Osman Özköylü bu klubun başında tarixi nəticələr əldə etmişdi. Təkcə bir faktı vurğulayaq ki, o, baş məşqçi postuna gətirilərkən – 2021-ci il oktyabrın 25-də “Pendikspor” 2-ci liqada, yəni 3-cü divizionda çıxış edirdi. İlk mövsümdəcə komandanı 1-ci liqaya daşıyan 52 yaşlı mütəxəssis ötən mövsüm “Pendikspor”u 1-ci liqada 3-cü edərək pley-offa çıxardı. Orda finala yüksələn və həlledici görüşdə “Bodrum”u yenən “Pendikspor” tarixində ilk dəfə elitaya vəsiqə əldə etdi. Amma Türkiyədə hətta belə uğurlar qazanan məşqçiyə də vaxt verilmir. “Pendikspor” elitada 8 oyundan 4 heç-heçə, 4 məğlubiyyətlə ayrılandan sonra Özköylü ilə yollar ayrıldı. Yeni baş məşqçinin Fatih Təkkə olacağı gözlənilir. 46 yaşlı Təkkə mövsümə “İstanbulspor”un başında başlamışdı. Amma bu komanda ilk 4 oyunda qələbəyə həsrət qalınca Təkkə istefa vermişdi. Göründüyü kimi, bu mütəxəssis İstanbulun bir klubundan digər klubunun başına keçmək üzrədi. Onu da bildirək ki, Özköylünün ayrılması ilə birlikdə 8 tur ərzində istefa verən məşqçilərin sayı 8-ə çatdı. Daha öncə “Ankaragücü”, “İstanbulspor”, “Kayserispor”, “İstanbul BŞ”, “Qaziantep”, “Samsunspor” və “Beşiktaş” məşqçisi ilə vidalaşmışdı. Ötən sayımızda “Trabzonspor”, “Antalyaspor” və “Konyaspor”da da istefaların gözlənildiyini xəbər vermişdik. Türkiyə mətbuatının yazdığına inansaq, qaradənizlilər artıq Nenad Byelitsa ilə təzminat məsələsində anlaşıb. Amma rəsmi şəkildə hələ ki istefa açıqlanmayıb. “Antalyaspor”un başında olan Nuri Şahin sosial şəbəkədə açıqlama verərək istefa ilə bağlı yayılan şayiələri təkzib edib və işini davam etdirəcəyini bildirib. “Konyaspor” rəhbərliyi isə serbiyalı mütəxəssis Aleksandar Stanoyeviçə daha bir qədər vaxt vermək qərarına gəlib.

Yeri gəlmişkən, “Samsunspor” da, nəhayət, özünə yeni baş məşqçi tapıb. Klub saytının verdiyi məlumata görə, bu vəzifəyə Markus Qisdol gətirilib. 54 yaşlı almaniyalı mütəxəssis daha öncə ölkəsində “Hoffenhaym”, “Hamburq” və “Köln”ü çalışdırıb. Onun sonuncu iş yeri “Lokomotiv” olmuşdu. Amma Rusiyada çox uğursuz nəticələrlə yadda qalan Qisdol cəmi 4 aydan sonra – 2022-nin martında qovulmuşdu. Onu da bildirək ki, FİFA srağagün “Samsunspor”a transfer cəzası verildiyini rəsmən açıqlasa da, komanda bu qərarı İdman Arbitraj Məhkəməsinə daşıyıb.