“CBC Sport” Ağsudakı durumla bağlı PFL-ə raport təqdim edəcək
Belə görünür ki, “İmişli” növbəti mövsüm start götürənə qədər doğma rayondakı stadionda təmir-yenilənmə işlərini başa çatdıra bilməyəcək.
"Football-plus.az" xəbər verir ki, bir ara ev oyunlarını Bakıda keçirmək fikrinə düşən, ancaq AFFA-nın xəbərdarlığından sonra bu sevdadan vaz keçən Aran təmsilçisi alternativ variant axtarışına çıxıb.
İndi də “İmişli” Ağsu şəhər stadionunun üzərində dayanıb. Çempionatın yayın hüququn sahib “CBC Sport” telekanalının əməkdaşları artıq arenanı texniki baxışdan keçirib. Stadionda süni örtüklü meydança mövcud olsa da, onun keyfiyyəti beynəlxalq standartlara tam cavab vermir. Düzdü, UEFA-dan təsdiq cavabı alınıb, ancaq infrastruktur baxımından vəziyyət qənaətbəxş sayılmır. “CBC Sport”un daha əvvəl də stadionu ziyarət etdiyi, lakin yayın üçün minimal texniki şəraitin belə təmin olunmadığını gördüyü bildirilir.
Bəs telekanalın orda qarşılaşacağı çətinliklər nədən ibarətdi? Keyfiyyətli yayının təşkili yolunda hansı problemlər var? Bu sualları kanalın baş redaktoru Şəmsəddin Abbasova ünvanladıq:
“Keçirdiyimiz baxışla bağlı raport hazırlanacaq, PFL-ə göndəriləcək və müvafiq tədbirlər görüləcək. Stadiona çox gözəl bir məkanda yerləşir. Ağsu stadionu olduqca maraqlıdı, hər kəsin diqqətini çəkəcək. Biz də səbirsizliklə gözləyirik ki, heyətimizlə birlikdə orda iş başında olaq. Yayın çox önəmlidi. Misli premyer-liqasının digər oyunlarının yayını ilə bağlı bəzi çatışmazlıqlar mövcuddu. Lakin inanırıq ki, yaxın vaxtlarda bu problemlər aradan qalxacaq. Beləliklə, Ağsudan daha çox canlı reportajlar təqdim edə biləcəyik”.
ƏSƏD SEYİDOV
