Rusiya klublarının İstanbul nəhənglərinin ulduzlarına marağı davam edir.

"Football-plus.az" xəbər verir ki, ''Spartak'' ilə ''Zenit'' qışda Jedson Fernandeşi ''Beşiktaş''dan qoparmağa cəhd etsələr də, istəklərinə çata bilməmişdilər. Baxmayaraq ki, ortada 25 milyon avroluq təklif var idi. Bu klublar hələ də Fernandeşdən əllərini üzməyiblər.

Bu arada ''Zenit'' indi də diqqətini ''Qalatasaray''ın ulduzu Qabriel Saraya yönəldib. Bu xəbəri Türkiyə mətbuatı yayıb. İddialara görə Sankt-Peterburq nəhəngi ''Cim-Bom''a 15 milyon avro təklif edib. Türkiyədə illik 2,3 milyon avro qazanan futbolçunun özünə isə bundan ikiqat artıq - 4,5 milyon avro maaş təklif olunub. Ancaq bu təklif nə Türkiyə çempionunu, nə də ''sambaçı''nı qane edib. Həm klub, həm də futbolçu təklifi geri çevirib.

Bir müddət öncə Sara ilə ''Mançester Siti''nin yaxından maraqlandığı iddia edilmişdi.

''Qalatasaray''ın ötən yay 18 milyon avroya ''Norviç''dən transfer etdiyi 25 yaşlı Sara geridə qoyduğumuz mövsümdə 45 rəsmi oyunda 2 qol, 10 məhsuldar ötürmə ilə fərqləndi.

Onun ''sarı-qırmızılar''la 2029-a qədər müqaviləsi var.