''Beşiktaş'' bu qış önəmli futbolçularından birini itirə bilərmiş. Söhbət Jedson Fernandeşdən gedir.

Portuqaliyalı ulduz Rusiya klublarının hədəfində idi. Həm ''Zenit'', həm də ''Spartak'' 26 yaşlı yarımmüdafiəçiyə görə əvvəlcə 15 milyon avroluq təklif irəli sürmüşdü. ''Beşiktaş'' bu təklifi geri çevirdikdən sonra ''Zenit'' danışıqları dayandırdı.

Amma iddialara görə ''Spartak'' bir neçə gündən sonra yenidən İstanbul nəhənginin qapısını döyərək bu dəfə 25 milyon avroluq təklif göndərdi. Fernandeş Rusiyaya yollanmağa razı idi. Çünki Moskva nəhəngi ona illik 4 milyon avro maaş ödəməyə hazır idi. Amma ''ağ-qaralar''ın prezidenti Sərdar Adalı məsələyə qarışaraq bu təklifi də geri çevirdi. Ona görə də Fernandeş ən azı mövsümün sonuna qədər ''Beşiktaş''da qalası oldu.

Bu futbolçunun transfer dəyərinin 17 milyon avro olduğunu nəzərə alsaq, Adalının bu qədər sərfəli təklifi geri çevirməsinin altında başqa səbəb yatır. Məsələ burasındadı ki, Fernandeşin satışından əldə olunacaq məbləğin 50 faizi ''Benfika''ya çatmalıdı. Klublar arasında 2021-ci ildə imzalanan müqavilədə belə bir maddə var. İndi Adalı mövsümün sonuna qədər ''Benfika'' ilə danışıqlar apararaq bu maddəni ləğv etməyə çalışacaq. O buna nail olsa, artıq yayda Fernandeşi istədiyi məbləğə sata biləcək.

''Beşiktaş'' ilə 2027-yə qədər müqaviləsi olan Fernandeş bu mövsüm 34 rəsmi oyunda iştirak edərək aktivinə 8 qol, 2 məhsuldar ötürmə yazıb.

ƏLİ