İtaliya çempionatında yeni mövsümün püşkü atılıb və təqvim bəlli olub.

"Football-plus.az" xəbər verir ki, A seriyasında 2025/26 mövsümü avqustun 23-də start götürəcək və gələn ilin mayın 24-də başa çatacaq.

Təqvim bəlli olduqdan sonra bəzi prinsipial oyunlarla bağlı maraqlı statistikalar ortaya çıxıb. Məsələn, ''Latsio''nun ''Roma'' ilə qarşılaşacağı mövsümün ilk Roma derbisi artıq 4-cü tura təsadüf edəcək. ''Roma'' indiyə qədər A seriyasının 4-cü turunda əzəli rəqibinə qarşı keçirdiyi 3 oyunun heç birində uduzmayıb! ''Canavarlar'' bu həftəyə təsadüf edən oyunlardan 1935-in oktyabrında 1:0, 2013-ün sentyabrında 2:0 üstün olublarsa, 1937-nin oktyabrındakı oyunda 1:1-lik bərabərlik qeydə alınıb.

Daha bir maraqlı faktı Milan derbisi ilə bağlıdı. İlk derbi 12-ci tura təsadüf edəcək. Məlum olub ki, ''Milan'' indiyə qədər A seriyası tarixində ''İnter''ə qarşı 12-ci turda keçirdiyi 8 qarşılaşmanın heç birində uduzmayıb (4 qələbə, 4 heç-heçə)! Sonuncu belə oyun yaxın keçmişdə - 2021-ci ilin noyabrın 7-də baş tutub və 1:1 hesabı ilə yekunlaşıb.

Digər prinsipial oyunlardan ''Yuventus'' ilə ''İnter''in 3-cü turda, ''Yuventus'' ilə ''Milan''ın isə 6-cı turda qarşılaşacağını bildirək.