Dünən məlum olduğu kimi hər üç avrokubok turnirində 1/8 final mərhələsinin püşkü atıldı.

''Football-plus.az'' xəbər verir ki, ''Qalatasaray''ın mübarizəni dayandırmasının ardından yoluna davam edən yeganə Türkiyə təmsilçisi olan ''Fənərbaxça''nın da rəqibi bəlli oldu.

İstanbul nəhəngi ya ''Olimpiakos'', ya da ''Reyncers''lə düşə bilərdi. Nəticədə rəqib məhz Şotlandiya təmsilçisi oldu. İlk oyun martın 6-da İstanbulda, cavab görüşü 1 həftə sonra Qlazqoda keçiriləcək. ''Fənər'' bu maneəni adlasa, növbəti mərhələdə ''Roma'' - ''Atletik'' cütünün qalibi ilə qarşılaşacaq. Komanda həm 1/4 finalda, bir qədər də irəliləsə, həm də yarımfinalda ilk oyunu evdə keçirəcək.

''Fənərbaxça'' üçün iki sevindirici xəbər var. Birincisi, ''Reyncers''lə iki oyunun arasına təsadüf edən Türkiyə çempionatının 27-ci turunda ''Fənər''in oyunu yoxdu. Yəni komandanın cavab matçına hazırlaşmaq üçün kifayət qədər zamanı olacaq. İkinci məqam isə odu ki, ''Fənərbaxça'' indiyə qədər Şotlandiya təmsilçilərinə qarşı keçirdiyi 4 oyunun heç birində uduzmayıb (1 qələbə, 3 heç-heçə)! Bunlardan 2-si məhz elə ''Reyncers''ə qarşı olub. 2001/02-də ÇL-in təsnifat mərhələsində ''sarı-lacivərdlilər'' bu rəqiblə səfərdəki qolsuz bərabərliyin ardından evdə 2:1 qalib gəlmişdi.

Joze Mourinyonun komandaları indiyə qədər heç vaxt rəsmi oyunda ''Reyncers'' ilə qarşılaşmayıb. 2007-də onun çalışdırdığı ''Çelsi'' hazırlıq oyununda ''Aybroks''da ''Reyncers''in qonağı olmuş və 0:2 hesabı ilə uduzmuşdu.

ƏLİ