Bu qrupun kuliminasiya nöqtəsi böyük maraqla gözlənilirdi.

Avstriya ilə Norveç son tura eyni xalla daxil olmuşdu. Avstriya top fərqində öndə olduğu üçün üstünlük bu komandanın tərəfində idi. Ötən tur evdə Norveçlə oyunda darmadağın olan Sloveniyanın Vyanada rəqibinə layiqincə müqavimət göstərəcəyi inandırıcı görünmürdü. Hərçənd sloveniyalıların 2-ci pilləni tutmaq şansı var idi. Komanda qələbə qazanacağı təqdridə şəxsi oyunlarda Avstriyadan üstün olduğu üçün 2-ci yeri tutacaqdı.

İlk yarıda proqnozlar doğruldu və Avstriya fasiləyə öndə yollandı. Amma meydan sahibləri 2-ci hissədə üstünlüyü artırmaq əvəzinə bu qolla kifayətləndi. Bu üzdən futbol dərhal onları cəzalandırdı. Son anları üstün keçirən Sloveniya bərabərlik qolunu vurmağa müvəffəq oldu.

Bu nəticə Avstriyanın liderliyinin üzərindən qalın bir xətt çəkdi. Çünki Osloda sürpriz qeydə alınmadı. Qazaxıstan evdəki ilk görüşdə Holannın qarşısını kəsməyi bacarmışdı. Amma həmin oyundan bəri həm qola, həm də xala həsrət qalan Stanislav Çerçesvoun komandası Osloda pərən-pərən düşdü. Norveç artıq ilk yarıda 3 dəfə fərqlənməklə intriqanı öldürdü. Holann yenə diqqətləri üzərinə çəkərək hesabına het-trik yazdı. Bu, 24 yaşlı forvardın yığmada artıq 4-cü het-triki oldu! Norveç lider olmaqla B liqasına yüksəldi.

Qazaxıstanın bu qrupda sonuncu olmasını sürpriz adlandırmaq olmaz. Amma qazaxların qrupu 0:15 top fərqi ilə tamamlaması yerli federasiyanı və Çerçesovu narahat etməyə bilməz.

B liqası, 3-cü qrup
6-cı tur
Avstriya – Sloveniya 1:1 (1:0)
Avstriya: Pents, Poş, Linhart, Vöber, Mvene, Zayvald, Laymer (Qrillitş, 90), Şmid (Qreqoritş, 84), Baumqartner, Zabitser, Arnautoviç (Vimmer, 90).
Sloveniya: Oblak, Karniçnik, Brekalo, Biyol, Yanza, Elsnik (Lovriç, 81), Qnezda Çerin, Stoyanoviç (Petroviç, 64), Mlakar (Şporar, 81), Vipotnik (Drkuşiç, 90), Şeşko.
Qollar: Şmid, 27 (1:0). Qnezda Çerin, 81 (1:1).
Vərəqələr: Brekalo, 16. Laymer, 55. Qnezda Çerin, 83 – sarı.
Hakim: Qlenn Nyuberq (İsveç).
17 noyabr. Vyana. 46000 tamaşaçı.

Norveç – Qazaxıstan 5:0 (3:0)
Norveç: Selvik, Pedersen (Heqqem, 62), Qreqersen (Lanqos, 72), Esteqor, Ryuyerson, Berge, Torstvedt (Berq, 62), Sörlot (Larsen, 62), Torsbi, Nusa, Holann (Rösler, 85).
Qazaxıstan: Pokatilov, Astanov, Kasım, Alip, Voroqovski, Taqıberqen (Baltabekov, 90), Tapalov (İslamxan, 46), Çesnokov (Payruz, 51), Samorodov (Astanov, 68), Zaynutdinov, Aymbetov (Jaksılıkov, 46).
Qollar: Holann, 23 (1:0). Holann, 37 (2:0). Sörlot, 41 (3:0). Holann, 71 (4:0). Nusa, 76 (5:0).
Vərəqələr: Aymbetov, 43. Jaksılıkov, 88 – sarı.
Hakim: Yasper Verqoote (Belçika).
17 noyabr. Oslo. 23458 tamaşaçı.

1. Norveç 6 4 1 1 15-7 13
2. Avstriya 6 3 2 1 14-5 11
3. Sloveniya 6 2 2 2 7-9 8
4. Qazaxıstan 6 0 1 5 0-15 1