Şübhəsiz ki, geridə qoyduğumuz mövsümdə Türkiyə çempionatının ən zəif klubu ''Adana Dəmirspor'' oldu.

Mövsümün əvvəlindən ciddi maddi problemlər yaşamağa başlayan, məşqçiləri əlcək kimi dəyişən Adana təmsilçisinin elitanı tərk edəcəyi hələ ilk dövrənin gedişində heç kimdə şübhə doğurmurdu. Çoxsaylı borcları üzündən kluba aktivindən ümumilikdə 12 xal silinmişdi.

Adətən Türkiyədə bu cür vəziyyətə düşən klubun növbəti illərdə də sürətli enişi davam edir. Ona görə də çox güman ''Adana Dəmirspor'' gələn mövsüm 1-ci liqada da autsayderlərdən biri olacaq. Bu arada necə deyərlər ''acınnan günorta duran'' ''Adana Dəmirspor''a sabiq futbolçusu Mario Balotelli tərəfindən də böyük bir şok xəbər gəlib.

Məlum olduğu kimi tanınmış italiyalı futbolçu bu klubda iki fərqli dönəmdə forma geymişdi. 2021/22-də sərgilədiyi gözəl oyunla fanatların sevimlisinə çevrilən 34 yaşlı ''Super Mario'' daha sonra uğursuz İsveçrə macərasının ardından 2023-ün yayında yenidən Adanaya dönmüşdü. Amma onun ikinci dönəm uğursuz alınmış və cəmi 6 aydan sonra bitmişdi. Sən demə Balotelli hər iki dönəmdə maaşını ala bilmədiyinə görə klubdan FİFA-ya şikayət edibmiş.

İtaliyalı jurnalist Alfredo Pedullanın xəbərinə görə Balotelli şikayətində haqlı çıxıb. FİFA-nın qərarı ilə indi ''Adana Dəmirspor'' məşhur futbolçuya 3,15 milyon avro təzminat ödəməlidi! Onsuz da borcların içində üzən adanalıların bu pulu Balotelliyə necə ödəyəcəyi böyük maraq doğurur.

Geridə qoyduğumuz mövsümdə ''Cenoa''da cəmi 56 dəqiqə oynamaq şansı qazanan İtaliya yığmasının sabiq üzvü ''Adana Dəmirspor''da ümumilikdə 51 rəsmi qarşılaşmada forma geyərək 26 qol, 8 məhsuldar ötürməlik performans sərgiləyib.