Türkiyə təmsilçiləri bir-birinin ardınca üzücü xəbərlər almaqdadı.

Dünən FİFA-nın ''Sivasspor''a 3 dönəm üçün transfer cəzası verməsi xəbərini paylaşmışdıq. Bu olayın üstündən heç 24 saat ötmədən superliqanın daha bir təmsilçisinə cəza gəldi. Amma bu dəfə söhbət transfer yox, xal silmə cəzasından gedir.

Belə ki, FİFA-nın qərarı ilə ''Adana Dəmirspor''un hesabından 6 xal silinib! Bu faktı Türkiyə Futbol Federasiyası da təsdiqləyib. Cəzanın səbəbi rəsmi olaraq açıqlanmasa da, bəzi mənbələr bunun Yonas Svenssona olan borcun hələ də tam ödənilməməsi ilə bağlı olduğunu iddia edir.

Hazırda ''Beşiktaş''da top qovan 31 yaşlı norveçli müdafiəçi 2021-in yayından 2024-ün yanvarına qədər adanalıların uğurları üçün tər töküb. ''Adana Dəmirspor''un onsuz da buna qədər da aktivindən xal silinmişdi. TFF lisenziyalaşdırma proseduruna düzgün əməl etmədiyi üçün 3 və ''Qalatasaray''la oyunda meydanı yarımçıq tərk etdiyi üçün də 3 xal olmaqla ümumilikdə bu kluba 6 xallıq cəza vermişdi. Bu cəzalar üzündən adanalıların aktivində zatən cəmi 3 xal qalmışdı. FİFA-nın da cəzası əlavə olunduqdan sonra artıq klub mənfi 3 xala malikdi!

Çox ciddi maddi sıxıntılar yaşayan ''Adana Dəmirspor''un həm də transfer cəzası var. Sabiq baş məşqçi Patrik Klyuvertə olan borcu ödəmədiyi üçün kluba 3 dönəm transfer cəzası verilib. Zatən mövsümboyu sonuncu pillədə qərarlaşan ''Adana Dəmirspor''un elitanı tərk edəcəyi heç kimdə şübhə doğurmurdu. Klub artıq indidən gələn mövsüm üçün 1-ci liqanın oyunlarına hazırlaşa bilər. Amma bu gedişlə Adana təmsilçisi gələn il 1-ci liqada da autsayderlərdən olacaq.

ƏLİ