Türkiyə çempionatında 28-ci tur bu günkü oyunlarla davam edib.

Günorta keçirilən matçda ''Bodrum'' səfərdə ''Çaykur Rizəspor''u 2 cavabsız qolla məğlub etdi. ''Football-plus.az'' xəbər verir ki, bu nəticədən sonra elitanı tərk edən ilk klub bəlli oldu.

Zatən ''Adana Dəmirspor''un elitanı tərk edəcəyi heç kimdə şübhə doğurmurdu. 1-ci turdan etibarən zirzəmiyə yuvarlanan və ordan heç cür çıxa bilməyən Adana təmsilçisi 26 oyundan 2 qələbə, 4 heç-heçə, 20 məğlubiyyətlə ayrılıb. Əslində 10 xal toplayan bu kollektivə ümumilikdə 12 xallıq cəza verildiyindən hazırda adanalıların aktivində mənfi 2 xal var. Qalan 10 turda komanda maksimum - 30 xal toplasa belə, aktivində yalnız 28 xal olacaq.

15-ci pillədəki ''Bodrum'' ''Çaykur Rizəspor''u yenməklə xalını 30-a yüksəltdi. 15-ci pillə isə elitada qalmağa imkan verən son pillədi. Bu da o deməkdi ki, ''Adana Dəmirspor''un hətta riyazi cəhətdən də elitada qalmaq şansı tükəndi və maddi cəhətdən çox bərbad durumda olan bu kollektivin 1-ci liqaya yuvarlanması rəsmiləşdi.

ƏLİ