''Qalatasaray''da qapıçı axtarışları davam edir.

''Football-plus.az'' xəbər verir ki, ünlü uruqvaylı qapıçı Fernando Muslera mövsümün sonunda 14 illik ''Qalatasaray'' karyerasını tamamlayaraq vətəninə qayıdacaq. Türkiyə mətbuatında tez-tez müxtəlif qapıçıların adları ''Cim-Bom'' ilə yanaşı hallandırılır.

Ən son iddia Alisson Bekker ilə bağlıdı. İstanbul nəhənginin rəsmiləri ''Liverpul'' və Braziliya yığmasının qapıçısının meneceri ilə görüşərək onun mümkün transferini müzakirə ediblər. Amma danışıqlar prosesi demək olar, başlamadan yekunlaşıb. Belə ki, Alissonun meneceri Səudiyyə Ərəbistanından illik 30 milyon avroluq təklif aldıqlarını bildirərək ''sarı-qırmızılar''dan ən azı 25 milyon avro maaş tələb edib.

Bu cavab ''Qalatasaray'' rəsmilərini şoka salıb. Ona görə də tərəflər məsələni çox uzatmadan masadan qalxıblar. Özü də nəzərə alaq ki, Alissonun ''Liverpul'' ilə 2027-yə qədər müqaviləsi var. Yəni hələ mersisaydlılar da bu transfer üçün müəyyən təzminat tələb edəcəklər. Digər braziliyalı qapıçı - ''Mançester Siti''li Edersonda da durum bənzərdi. Onun da maaş tələbi ''od tutub yandığı üçün'' ''Qalatasaray'' ona yaxın düşə bilmədi. Bu gedişlə ''Cim-Bom'' deyəsən elə yerli qapıçı transfer edəcək. Əsas namizədlər ''Trabzonspor''lu Uğurcan Çakır ilə ''Eyüpspor''lu Berke Özərdi. Sonuncu ümumiyyətlə neçə vaxtdı, komandanın gündəmindədi.

Bir şey dəqiqdi ki, Günay Güvənç ən azı ikinci qapıçı kimi klubda qalmaqda davam edəcək. Bu əlcək sahibi bu mövsüm Musleranın oynamadığı matçlarda heç də pis təsir bağışlamayıb. Günay tək performansı ilə yox xarakteri, məsuliyyətdən çəkinməməsi və əcnəbi dil bildiyi üçün komandada körpü rolunu oynadığı üçün də rəhbərliyin rəğbətini qazanıb.

Yayda ona yeni maaş və müqavilə təklif olunacağı gözlənilir.