Fevralın 11-də Türkiyədə qış transfer dönəminə yekun vuruldu.

''Transfer pəncərəsi''ni fəal keçirən ''Qalatasaray'' son gündə heyətinə daha iki yeni futbolçu cəlb etdi. İstanbul nəhəngi uzun müddətdi, danışıqlar apardığı ''Trabzonspor''lu Ərən Elmalının transferini nəhayət ki, rəsmiləşdirdi. Klubdan verilən açıqlamada bu futbolçu ilə ''3,5+1'' illik müqavilə imzalandığı qeyd olunub. Bu transfer ''sarı-qırmızılar''a 129,7 milyon lirəyə başa gəlib ki, bu da təxminən 3,4 milyon avroya bərabərdi. Bundan başqa Ərənin sonrakı satışından ''Trabzonspor''a 25 faiz pay da veriləcək. Bu mövsümün sonuna qədər Elmalıya 14 milyon lirə (373 min avro) maaş ödəniləcək. Gələn mövsüm üçün onun qazancı 45 milyon lirə təşkil edəcək və bu məbləğ hər növbəti il 10 milyon lirə artacaq. Türkiyə yığmasına da daimi cəlb olunan Ərən Elmalı müdafiənin sol cinahında oynayır. 24 yaşlı futbolçu ''Kasımpaşa''nın yetirməsidi və peşəkar karyerasına da bu klubda start verib. ''Trabzonspor''un şərəfini isə 2022-ci ildən qoruyurdu. Ərən bu mövsüm 23 rəsmi oyunda iştirak edərək aktivinə 1 məhsuldar ötürmə yazıb.

''Qalatasaray''ın digər transferi isə gələcəyə hesablanıb. İstanbul nəhəngi 1-ci liqa təmsilçisi ''Ankaragücü''dən gənc mərkəz müdafiəçisi Arda Ünyayı heyətinə qatıb. Bu transfer komandaya 500 min avroya başa gəlib. Futbolçunun sonrakı satışından paytaxt təmsilçisinə 10 faiz pay da veriləcək. 2007-ci il təvəllüdlü Arda ilə 3,5 illik müqavilə imzalanıb. Türkiyənin U-19 yığmasının üzvü olan istedadlı futbolçu bu mövsüm ankaralıların heyətində 4 rəsmi oyun keçirib.

Beləliklə, ''Qalatasaray'' bu qış heyətini 7 futbolçu ilə gücləndirdi. Ərən Elmalı ilə Arda Ünyaydan öncə komanda Ahmed Kutucu, Alvaro Morata, Mario Lemina, Karlos Kuesta və Pşemislav Frankovskini transfer etmişdi.

ƏLİ