Çempionluq yarışında ''Qalatasaray''dan 5 xal geri düşən ''Fənərbaxça'' yavaş-yavaş yeni mövsümün planlaşdırmasını edir.

''Football-plus.az'' xəbər verir ki, yayda İstanbul nəhənginin heyətdə çox ciddi dəyişikliklər edəcəyi və ən azı 10 futbolçu ilə yollarını ayıracağı gözlənilir. Vidalaşmağa əsas namizəd olan isimlərin başında qapıçı Dominik Livakoviç gəlir. ''Fənər''in 2023-cü ildə Zaqreb ''Dinamo''sundan 6,6 milyon avroya transfer etdiyi xorvatiyalı əlcək sahibinin zatən layiqli əvəzləyicisi var. Livakoviç bu mövsüm zədə üzündən heç də az oyun qaçırmayıb. Onun olmadığı matçlarda İrfan Can Eğribayat ümidləri doğrultmağı bacarıb.

Türkiyə mətbuatının iddiasına görə həm ''Fənər'' bu qapıçı ilə vidalaşmağım, həm də Livakoviç özü Türkiyədən ayrılmağın əleyhinə deyil. Şayiələrə inansaq, 30 yaşlı qapıçı karyerasını İspaniyada davam etdirmək arzusundadı. Meneceri onun üçün İspaniyada klub axtarır. Digər tərəfdən Joze Mourinyo da rəhbərliyə gələn mövsüm yerli qapıçıdan faydalanmaq istədiyini bildirib. Hərçənd Mourinyonun özünün də gələn mövsüm ''sarı-lacivərdlilər''də qalıb-qalmayacağı bilinmir. Amma ''Fənərbaxça'' Xorvatiya yığmasının qapıçısını təbii ki, pulsuz buraxmaq niyyətində deyil. Livakoviçin 2028-ci ilə qədər müqaviləsi var və İstanbul nəhəngi Xorvatiya yığmasının qapıçısının satışından 10 milyon avro gəlir əldə etməyi planlaşdırır.

Livakoviç bu mövsüm 30 rəsmi oyuna çıxıb və bunların yalnız 9-da qapısını toxunulmaz saxlayıb.