''Trabzonspor'' qış transfer dönəmində ''Qalatasaray''a göndərdiyi Ərən Elmalı sayəsində pul qazanmaqda davam edir.

"Football-plus.az" xəbər verir ki, 24 yaşlı sol cinah müdafiəçisi fevralın 11-də 3,5 milyon avroya İstanbul nəhənginə transfer olunmuşdu. Həmin vaxt Trabzon təmsilçisi müqaviləyə çempionluqla bağlı xüsusi maddə saldırmışdı.

Belə ki, ''Cim-Bom'' çempion olacağı təqdirdə ''Trabzonspor''a əlavə olaraq 500 min avro (təxminən 22 milyon lirə) ödəmək öhdəliyini üzərinə götürmüşdü. ''Qalatasaray'' məlum olduğu kimi çempionluğu artıq rəsmiləşdirib.

Ona görə də ''sarı-qırmızılar'' qarşıdakı günlərdə ''Trabzonspor''un hesabına 500 min avro köçürməli olacaq. ''Bordo-mavililər''ə 2022-ci ildə ''Kasımpaşa''dan gələn və son dönəmlərdə Türkiyə yığmasına da sabit olaraq dəvət alan Ərən Elmalı ''Qalatasaray''da indiyə qədər 16 rəsmi oyunda forma geyərək aktivinə 1 məhsuldar ötürmə yazıb.