Türkiyə çempionatında çıxış edən ''Ankaragücü''nün yeni baş məşqçisinin adına aydınlıq gəlib.

"Football-plus.az" xəbər verir ki, paytaxt təmsilçisi mövsümün qalan hissəsini Tolunay Kafkasın başçılığı altında keçirəcək.

Təcrübəli mütəxəssislə ilyarımlıq müqavilə imzalanıb. ''Ankaragücü'' 24 oyuna topladığı 25 xalla 15-ci pillədə qərarlaşıb. Kafkas bu mövsüm ankaralıları çalışdıran 4-cü mütəxəssis olacaq. Komanda mövsümə Mustafa Dalcı ilə başlasa da, 3-cü turdan sonra baş məşqçi postuna Ömər Ərdoğan gətirilmişdi. Amma Ərdoğan 23-cü turdan sonra istefa vermişdi. Komanda müvəqqəti məşqçi səlahiyyətlərini icra edən Sədat Ağçayın başçılığı altında isə son 3 oyundan 1 qələbə, 2 məğlubiyyətlə ayrılmışdı.

Daha öncə ''Kayserispor'', ''Qaziantepspor'', ''Trabzonspor'', ''Karabükspor''u çalışdıran 55 yaşlı Kafkas təxminən 6 illik fasilədən sonra superliqada işləmək fürsəti qazanıb. O, elitada sonuncu dəfə 2017-də ''Akhisar Bələdiyəspor''u çalışdırmışdı. 2017-dən bu yana o, Türkiyə Futbol Federasiyasında müxtəlif vəzifələrdə işləmişdi. Sonuncu iş yeri isə Türkiyənin gənclər yığması idi. Kafkas ötən ay həmin vəzifədən kənarlaşdırılmışdı. Yeri gəlmişkən onu Türkiyənin gənclər yığmasında Levənt Sürmə əvəzləyib.