Superliqanın iki klubunda məşqçi dəyişikliyi baş verib.

“Konyaspor” və “Bodrum”da yeni təyinatlar var. Ötən tur qeydə alınan məğlubiyyətlərdən sonra hər iki klub baş məşqçisi ilə vidalaşdı. “Konyaspor” Əli Çamdalı, debütant “Bodrum” isə İsmət Taşdəmir ilə yollarını ayırdı. Konya təmsilçisində uzun illər futbolçu kimi də çıxış etmiş və kapitan sarğısını daşımış Çamdalı bu vəzifəyə bu ilin aprelində gətirilmişdi. “Qaziantep”ə məğlubiyyətdən sonra rəhbərlik onunla qarşılıqlı şəkildə yollarını ayırdı. İsmət Taşdəmirin durumu isə fərqlidi. Onu artıq “Bodrum”un əfsanəsi saymaq olar. Çünki bu mütəxissis 2021-ci ildə baş məşqçi vəzifəsinə gətirilərkən komanda 2-ci liqada, yəni 3-cü divizionda çıxış edirdi. Yəni Taşdəmirin başçılığı altında Bodrum təmsilçisi çox böyük sıçrayışa nail olaraq tarixində ilk dəfə elitaya yüksəldi.

Əslində komandanın durumu faciəvi deyil. Son 3 turda 1 xal toplamasına baxmayaraq, “Bodrum” 10 turdan sonra 10 xalla 13-cü pillədədi. Buna baxmayaraq, rəhbərlik komandanın inkişafı üçün məşqçi dəyişikliyinə qərar verdi. 50 yaşlı mütəxəssis bazaya dəvət olunaraq alqışlar və gül-çiçəklə yola salındı. Yeni təyinatlara gəlincə, “Konyaspor” Rəcəp Uçarla mövsümün sonuna qədər, “Bodrum” isə Volkan Dəmirəl ilə üçillik müqavilə imzalayıb. Məşqçi karyerasına Abdulla Avcının köməkçisi kimi başlayan 49 yaşlı Uçar daha çox “Ümraniyəspor”da əldə etdiyi uğurla tanınır.

O, 2022-də “Ümraniyəspor”u tarixində ilk dəfə elitaya yüksəltmiş, ötən mövsümün gedişində “Kayserispor”u çalışdırmışdı. 43 yaşlı Volkan Dəmirəl isə məşqçi karyerasına “Fatih Karagümrük”də başlamış və daha sonra 2022-nin sentyabrından bu ilin mayına qədər “Hatayspor”da işləmişdi.
Türkiyə çempionatında hər mövsüm olduğu kimi, bu il də məşqçi istefalarının bolluğu diqqəti çəkir. Avqsutun 9-da başlayan mövsümün geridə qalan 84 günlük dönəmində artıq 5 klubda məşqçi dəyişikliyi reallaşıb. Bu da o deməkdi ki, təxminən hər 16-17 gündən bir məşqçi istefası baş verir! Yuxarıda qeyd etdiyimiz iki ayrılıqdan öncə “Trabzonspor” Abdulla Avcı, “Hatayspor” Özhan Pulat və “Adana Dəmirspor” Maykl Valkanis ilə yolları ayırmışdı. 2020-dən bəri olan dönəmə, yəni son 5 mövsümə nəzər salsaq, Türkiyə çempionatında məşqçi istefalarının sayının 121-ə çatdığını görərik. Bu baxımdan superliqa Avropanın ən güclü 10 çempionatı arasında hamıdan öndədi.

Bu müddətdə ən qeyri-sabit komanda “Kasımpaşa”dı. İstanbul təmsilçisi 5 mövsüm ərzində 9 dəfə məşqçi dəyişib! Sonrakı pillələrdə “Kayserispor” (9), “Beşiktaş” (7) və “Konyaspor” (7) qərarlaşıb.