Roman Qriqorçukun təntənə ilə “Neftçi”yə gətirdiyi Ramil Şeydayevin komandadan getmək niyyəti yoxdu.

Qriqorçuka inanıb Ramillə “2+1” illik müqavilə bağlayan “Neftçi” rəhbərliyi birinci dövrə bitən kimi ukraynalı mütəxəssisi istefaya göndərdi. İmkan olsaydı, yəqin ki, Şeydayevi də göndərərdilər. İndi isə vəziyyət belədi: müxtəlif ölkələrin aşağı dəstə klublarından təkliflər olsa belə, “Neftçi”də qalmaq, heç nədən pul qazanmaq niyyətində olan Ramil heç cür gedənə oxşamır.

Bəs 29 yaşlı hücumçunun bu qədər israrlı olması nə dərəcədə düzgündü?

Şeydayev bu mövsüm çempionatda 27 oyuna çıxıb, dörd qol, iki məhsuldar ötürmə ilə yadda qalıb. Heç bir vacib oyunda sözünü deməyib, hansısa fədakarlıq etməyib. Samir Abasovun ona güvənmədiyi açıq-aşkar görünür. Komanda yoldaşları ilə də arası o qədər isti deyil. Futbolçunun sırf daha çox pul qazanmaq amacı ilə oynamaq şansı qazanmadığı və qazanmayacağı komandada qalmaq inadının mənası nədi? - anlamaq çətindi.

Yenə hansısa legioner belə davransaydı, bir qədər anlamağa çalışardıq. Amma Ramil neçə illərdi millinin şərəfini qoruyur, “Qarabağ”da vacib işlər görüb. Onun belə hərəkəti, sadəcə, Azərbaycan futbolunda mənfi obraz kimi yadda qalmasına zəmin yaradır.

Bundan sonra Ramilin komandaya hansısa böyük fayda verəcəyi də inandırıcı deyil. Onun ən böyük faydası komandadan getmək olmalıdı. Əslində təkcə günah Ramildə deyil, onunla uzunmüddətli müqavilə imzalayanlardadı. “Neftçi” rəhbərliyi “2+1” illik müqavilə bağlayanda ondan hansı yüksək səviyyəli performans gözləyirdi ki? Ritorik sualdı...

MÜZƏFFƏR QULUZADƏ