“Neftçi” son günlərdə gördüyü işlərlə göz önündədi. Roman Qriqorçuk, ardından Ramil Şeydayev...

Bunların adını ona görə çəkdim ki, səs-küyə səbəb oldular. Düzdü, Şeydayevin “ağ-qaralar”a keçidi hələ rəsmən açıqlanmayıb. Amma Ramilin “Neftçi”nin düşərgəsində olması və Bakı klubuyla 3 illik müqaviləyə imza atacağı yalan məlumat deyil.

Ramil karyerası boyunca bir çox klub və ölkə görüb. “Zenit”lə “Rubin”in heyətində özünü Rusiya publikasına göstərəndən sonra 20 yaşında Türkiyənin ən nəhəng klublarından “Trabzonspor”da oynamaq imkanı qazandı. Ardından “Jilina”, “Krılya Sovetov”, “Dinamo” forması geydi. Azərbaycanda isə “Sabah” istiqaməti üzrə uzun yol qət edib, 2021-də “Qarabağ”ın düşərgəsinə - Qurban Qurbanovun sərəncamına döndü. Çünki daha əvvəl məhz 2017/18 mövsümündə də qısa müddətdə ağdamlıların formasını geymişdi. Sadəcə, 2021-də verilən qərar artıq yetkin, dünyanın çox üzünü görmüş Şeydayevin qərarı idi.

Ötən ilin yayında milli üzvü heç bir gözədəyən uğuru ilə tanınmayan “Buriram Yunayted”dən təklif aldı. Tayland klubunun pul kisəsi onu Avropadan Asiyaya apardı. Şeydayev qışda səhv seçim etdiyini anlayıb, “Buriram Yunayted”i “Kocaelispor”a dəyişdi. Türkiyə 1-ci liqasında isə azarkeşlər tərəfindən daim qınandı, tənqidlərə tuş gəldi. Mayda onun “Kocaelispor”da qalanlar sırasında göstərilməsi də az səs-küyə doğurmadı. Amma Şeydayev iki gün əvvəl ordan ayrıldı. Niyə? Çünki “Neftçi”dən aldığı təklifə “yox” deyə bilmədi. Bu dəfə də pul onun fikirlərini dəyişdi.

Bəs Ramilin adı “Qarabağ”la hallanırdı axı… Bəli, “Qarabağ” onun qayıdışına yenidən qol qoydu. Amma qayıdışı üçün tələb olunan məbləğ Ağdam təmsilçisinin ürəyincə olmadı. Belədə Qriqorçuka lazım olan Şeydayev “Neftçi”nin qismətinə düşdü. Vaxtilə göz yaşı içində Qurbanov və “Qarabağ” ilə sağollaşan həmin Ramil yenidən Azərbaycana, həm də ağdamlıların əzəli rəqibi “Neftçi”yə qayıdır. Görək bu dəfə nə alınır…

RÖYANƏ OĞUZ