''Eyüpspor''dan ayrılaraq məşqçi karyerasında yeni səhifə açan və Ukrayna nəhəngi ''Saxtyor'' ilə ikiillik müqavilə imzalayan Arda Turanın transfer etmək istədiyi ilk futbolçu bəlli olub.

Gənc mütəxəssisin gözəl tanıdığı Türkiyə ''bazarına'' maraq göstərməsi təəccüblü deyil. Yağız Sabuncuoğlunun paylaşdığı xəbərə görə ''Şaxtyor'' Ardanın tələbi ilə ''Fənərbaxça'' və Türkiyə yığmasının üzvü İsmayıl Yüksəkə ciddi şəkildə maraq göstərməyə başlayıb. Donetsk klubunun rəsmiləri yarımmüdafiəçi ilə bağlı məlumat toplamağa başlayıblar. Ancaq rəsmi təklif hələ irəli sürülməyib. İsmayılın mövsümü tam olaraq uğurlu keçirdiyini söyləmək çətindi.

Bəzən zədədən əziyyət çəkən, bəzən də heyətə düşməkdə problem yaşayan istedadlı futbolçu geridə qoyduğumuz mövsümdə yalnız 30 rəsmi oyunda iştirak edərək aktivinə 2 məhsuldar ötürmə yaza bildi. Əsasən dayaq yarımmüdafiəçisi kimi oynayan 26 yaşlı futbolçunun ''sarı-lacivərdlilər''lə 2028-ci ilə qədər müqaviləsi var. Amma ''Şaxtyor'' ona maraq göstərən yeganə klub deyil. Mövsümün gedişində ''Benfika''nın da bu futbolçunu diqqət mərkəzində saxladığı idda edilmişdi.

Mövsümün sonuna yaxın isə ''Marsel'' iddiaları ortaya atılmışdı. İsmayıl Yüksəkin transfer dəyəri 12 milyon avro civarında qiymətləndirilir.