“Şaxtyor” Arda Turana təklif göndərib?
Məşqçi karyerasının ilk klubu olan “Eyüpspor”da heç də pis təsir bağışlamayan, bu kollektivi ilk cəhddən elitaya daşıyan və bu mövsüm də avrokuboklara vəsiqə qazanmağa çalışan Arda Turanla bağlı xəbər var.
"Football-plus.az" xəbər verir ki, martın ortalarında Türkiyə mətbuatında Ukrayna nəhəngi “Şaxtyor”un Ardaya təklif göndərməsi barədə şayiələr peyda olmuşdu. Bu iddianı türkiyəli jurnalist Salim Manav ortaya atmışdı. Onun paylaşdığı xəbərə görə həmin vaxt nə “Eyüpspor” Ardanı buraxmaq istəmişdi, nə də gənc məşqçi özü Donetsk klubunda çalışmağa maraq göstərmişdi. Ona görə də tərəflər arasındakı danışıqlar demək olar, başlamadan yekunlaşmışdı.
Bu arada “Eyüpspor”un ukraynalı futbolçusu Taras Stepanenko bu mövzuda açıqlamalar verib. Məlum olduğu kimi, 2010-cu ildən “Şaxtyor”un şərəfini qoruyan 35 yaşlı Stepanenko bu qış məhz “Eyüpspor”a transfer olundu. Təcrübəli dayaq yarımmüdafiəçisi bugünlərdə Ukraynaın “Burbuzz” adlı “yutub” səhifəsinə geniş müsahibə verib. Təbii ki, ondan “Şaxtyor”un həqiqətən də Ardaya təklif göndərib-göndərməməsi də soruşulub. Ukrayna yığmasının üzvü bunları deyib:
“Bəli, bu şayiələrdən xəbərim var. Açığı, Ardanın özündən bu mövzunu soruşmamışam. Amma məndən “Şaxtyor”la bağlı məlumat istəsə, böyük məmnuniyyətlə klub haqda ona hər şeyi danışaram. Onun “Şaxtyor”un başına keçməsinə yalnız sevinərəm. Çünki həm yaxşı məşqçi, həm də yaxşı insandı. Futbolçu kimi də mükəmməl idi. Avropanın ən güclü klublarında oynayıb. Niyə də olmasın?! “Şaxtyor”un gənc məşqçiləri dəvət etmək təcrübəsi var. Fonseka ilə De Zerbini xatırlamaq kifayətdi. Onlar da ilk addımlarını böyük klublarda atmamışdılar. Arda Türkiyədə debütant olan və büdcəsi o qədər də yüksək olmayan bir klubla avrokuboklara vəsiqə uğrunda mübarizə aparır. Belə məşqçiyə marağın olması normaldı. Hər halda od olmayan yerdən tüstü çıxmaz. Mətbuatda bununla bağlı xəbər gedibsə, deməli, Arda ən azı “Şaxtyor”da namizədlər sırasında yer alıb”.
