''Şaxtyor''da Arda Turan dönəmi rəsmən başladı
''Şaxtyor''da gözlənilən təyinat reallaşıb. Ukrayna nəhəngi Arda Turanın baş məşqçi postuna gətirildiyini rəsmən açıqlayıb.
Türkiyəli mütəxəssis ilə ikiillik müqavilə imzalanıb. Arda müqaviləyə imza atmasının ardından bunları deyib:
''Şaxtyor''un başına keçdiyim üçün qürurluyam. Zəngin tarixə və gözəl ənənələrə malik bir klubdu. Avropada kifayət qədər tanınan və qalib mentalitetinə malik klubdu. Bu ənənələri davam etdirmək və oyunumuzla fanatlara gözəl anlar yaşatmaq istəyirik. Həm Avropada, həm də Ukrayna daxilində titullar qazanmaq üçün güclü bir motivasiyaya malikik''.
Bu təyinatın ardından Ardanın ''instaqram'' səhifəsində dəyişiklik etməsi diqqət çəkib. O, 10,6 milyonluq səhifəsində bioqrafiya bölməsində yazdığı ''həmişəlik ''Qalatasaray'' ifadəsini silib! Bu addımı ''Qalatasaray'' fanatları tərəfindən birmənalı qarşılanmasa da, onu anlamaq olar. Arda ''Şaxtyor'' tarixinin 39-cu məşqçisinə çevrilib. Donetsklilərdə eyni zamanda əcnəbi mütəxəssislərlə bağlı ənənə davam edib. Belə ki, 2004-cü ildən bu yana ''Şaxtyor''da yalnız əcnəbi məşqçilər işləyir. Xatırladaq ki, futbolçu kimi ''Qalatasaray'', ''Atletiko'', ''Barselona'' kimi klublarda top qovmuş Arda Turan məşqçi kimi ''Eyüpspor''u elitaya daşıması və ilk mövsümdə 6-cı pilləni tutması ilə diqqət çəkdi. ''Eyüpspor'' onun başçılığı altında 84 rəsmi oyundan 45 qələbə, 14 heç-heçə, 25 məğlubiyyətlə ayrılaraq 149 xal toplayıb ki, bu da hər oyuna orta hesabla 1,77 xal deməkdi.
Bu arada ''Şaxtyor''un icraçı direktoru Sergey Palkin də bu təyinat haqda danışaraq bunları deyib:
''Arda Turan bizdə kifayət qədər perspektivli və ambisiyalı məşqçi təəssüratı yaratdı. Özü də ciddi rəqabətə malik olan Türkiyə çempionatında işləməklə təcrübə toplayıb. Futbolçu kimi Avropa futbolunda iz buraxıb. Ümid edirik ki, ''Şaxtyor''la da önəmli bir məşqçi karyerasına sahib olacaq və bizə həm Ukraynada, həm də beynəlxalq arenada uğurlar qazandıracaq''.
Digər xəbərlər
