Arda Gülərin İspaniya macərasını tam olaraq uğurlu adlandırmaq çətindi. Hərçənd Türkiyə yığmasının ulduzu daimi oyun praktikasına malik olmasa da, şans qazandığı matçlarda pis təsir bağışlamır.

Arda hələ də ''Fənərbaxça''ya bonuslar qazandırmaqda davam edir. Məlum olduğu kimi 20 yaşlı yarımmüdafiəçi 2023-cü ilin yayında ''20+10'' milyon avro qarşılığında ''Fənər''dən Madrid nəhənginə yollanmışdı. 10 milyon avroluq bonusun şərtləri futbolçunun oyun sayı ilə bağlıdı. Belə ki, iki klub arasında anlaşmaya əsasən Ardanın hər 25-ci rəsmi oyununda ''kral klubu'' ''sarı-lacivərdlilər''ə 2 milyon avro ödəməlidi. İstedadlı futbolçu ilk mövsümündə uzun müddət zədələrdən də əziyyət çəkmiş və yalnız 12 rəsmi oyuna çıxa bilmişdi.

Bu mövsüm isə vəziyyət fərqlidi. Arda 2024/25-də artıq 37 rəsmi oyunda forma geyib. Yəni o, cari mövsüm sabiq klubuna artıq 2 milyon avro qazandırıb. Hazırda aktivində 49 rəsmi oyun olan Gülər artıq bu gün İspaniya kubokunun finalında 50-ci oyununa çıxa və ''sarı-lacivərdlilər''ə növbəti 2 milyon avroluq bonusu qazandıra bilər.

Maraqlıdı ki, ötən həftə ''Xetafe''yə qarşı matçda Arda Gülər klub karyerasında 100-cü oyununu keçirdi. O, bunlardan 51-ni ''Fənər'', 49-nu ''Real''ın heyətində keçirib. Türkiyə karyerasında 9, İspaniya karyerasında 10 qol olmaqda bu 100 görüşdə aktivinə 19 qol, 16 məhsuldar ötürmə yazıb.

Yeri gəlmişkən, onu da bildirək ki, ''Xetafe'' ilə oyunda yeganə qolu vurmaqla komandasına vacib qələbə qazandıran Gülər La Liqada həftənin rəmzi ''11-liy''inə seçilib. O, 33-cü turda rəmzi komandaya düşən ''Real''ın yeganə üzvüdü.