''Napoli'' rəsmisi Osimhenin transferində son durumu açıqladı
25 qolla Türkiyə çempionatında bombardirlər yarışına başçılıq edən, eləcə də mövsüm ərzində 36 qol vuraraq Türkiyə futbolunda əcnəbilər arasında yeni rekord müəyyənləşdirən Viktor Osimhen ''Qalatasaray''da bir nömrəli gündəm mövzusu olmaqda davam edir.
Nigeriyalı hücumçu son olaraq çempionluğun rəsmiləşdiyi ''Kayserispor''la matçda da əla performans sərgilədi. Məhz onun qolu qələbənin əsasını qoydu. Osimhenin qolundan sonra stadionda onun adının öz qızı tərəfindən anons edilməsi diqqət çəkmişdi. Bu məqam Osimhenin özünün də böyük təəccübünə səbəb oldu.
Matçın ardından fanatlarla əylənən ulduz futbolçu daha sonra Mario Lemina ilə İstanbulun gecə klublarından birində səhərə qədər çempionluğu qeyd etdi. Amma onun Türkiyə macərası sürətlə sona yaxınlaşır. Artıq iki titul qazanan 26 yaşlı futbolçu ''Qalatasaray''ın heyətində superliqada qalan iki matçda da forma geydikdən sonra müqavilə ilə məxsus olduğu ''Napoli''yə qayıdacaq.
Bu arada Türkiyənin ''Sabah'' nəşri neapolluların bir rəsmisi ilə söhbətləşməyə müvəffəq olub. Həmin klub rəsmisi adının açıqlanmasını istəməyib. Sən demə 75 milyon avroluq sərbəst qalma maddəsi yalnız xarici klublar üçün keçərli imiş. İtaliya klubları üçün bu məbləğ daha böyükdü. Ona görə də ''Napoli'' Osimheni İtaliya klublarından birinə sataraq 100 milyon avroya yaxın gəlir əldə etməyi planlaşdırır. İtaliyada ilk növbədə ''Yuventus''un bu hücumçuya maraq göstərdiyi heç kimə sirr deyil. ''Napoli'' rəsmisi eyni zamanda Osimhenə ''Fənərbaxça'' tərəfindən maraq göstərilib-göstərilməməsi barədə suala da cavab verib:
''Osimhen Türkiyədə möhtəşəm mövsüm keçirdi. Qolları və performansı ilə Türkiyə çempionatına damğa vurdu. ''Qalatasaray'' da daxil olmaqla onu 7-8 klub almaq istəyir. İtaliya daxilindən daha yüksək təkliflər var. Amma sizə klub adı açıqlaya bilməyəcəm. Səudiyyə Ərəbistanından da onun durumunu yaxından izləyənlər var. Siz də gözəl bilirsiz ki, hər şey onun öz qərarından asılı olacaq. Amma indiyə qədər bizə rəsmi olaraq müraciət edən klub yoxdu. ''Fənərbaxça''? Bəli, bəzi menecerlər vasitəsilə Osimhenin durumu ilə maraqlanıb bizimlə görüşmək istədilər. Amma dediyim kimi heç kimdən rəsmi təklif almamışıq''.
