Viktor Osimhen ''Qalatasaray''ı çiynində daşımaqda və Türkiyə futbolunda fərq yaratmaqda davam edir.

''Football-plus.az'' xəbər verir ki, nigeriyalı forvard tək məhsuldarlığı ilə yox, həm də peşəkarlığı və komandası üçün can yandırması ilə də diqqət çəkir.

Amma Osimhen bilindiyi kimi müqavilə ilə ''Napoli''yə məxsusdu və Türkiyədə yalnız icarə əsasında top qovur. Mövsüm bitdikdən sonra o, İtaliyaya qayıtmalı olacaq. Ən son ''Fənərbaxça'' ilə səfər derbisində əla təsir bağışlayan və vurduğu qollarla ''sarı-qırmızılar''ı kubokda yarımfinala daşıyan Osimhenin daimi əsasda transfer edilməsi məsələsi yenidən gündəmə gəlib. Mövsümün gedişində ''Qalatasaray'' bir neçə dəfə ''Napoli'' ilə danışıqlar aparmağa cəhd etmişdi. Amma 26 yaşlı futbolçu üçün ''ortada dolaşan'' məbləğ Türkiyə futbolu üçün utopiya kimi səslənir. Təkcə ''Napoli''nin tələb etdiyi məbləğ 75 milyon avrodu!

Buna baxmayaraq Türkiyə mətbuatının yazdığına inansaq, ''Qalatasaray'' rəhbərliyi bu mövzunu gündəmdə saxlamaqda və Osimheni daimi əsasda transfer etməyin yollarını axtarmaqda davam edir. Başqan Dursun Özbək bu məsələ ilə yaxından maraqlanmaq və mümkün olan bütün variantları yoxlamaq üçün idarə heyətinin üzvü Abdulla Kavukcuya səlahiyyət verib.

Məlum olub ki, Osimhen ilə dördillik müqavilənin imzalanması ''Qalatasaray''a ən azı 135 milyon avroya başa gələcək! Bu məbləğin 65 milyon avrosu ''Napoli''yə ödəniləcək təzminatdı. Hərçənd neapolluların bu məbləğə razı olacağı böyük sual altındadı. Qalan məbləğ isə Osimhenin 4 illik maaşıdı. İstanbul nəhəngi sponsorlar dəstəyi ilə, eləcə də gələn mövsüm Çempionlar Liqasından əldə olunacaq gəlir ilə bu məbləğin altından qalxa biləcəyini düşünür. Osimhenin hər fürsətdəcə İstanbulda xoşbəxt olduğunu söyləməsi və klubu sevdiyini dilə gətirməsi də fanatları ümidləndirir. Nigeriyalı hər nə qədər Avropa nəhənglərinin hədəfində olsa da, onun Türkiyədə qalmaq ehtimalı da mövcuddu.

Osimhenin ''Qalatasaray''da indiyə qədər 32 rəsmi oyunda 28 qol, 5 məhsuldar ötürməlik mükəmməl performans sərgilədiyini bildirək.