''Qalatasaray''da Viktor Osimhen fırtınası həm meydanda, həm də ondan kənarda çox sərt şəkildə əsməkdə davam edir.

''Sarı-qırmızılar''ın heyətində 38 rəsmi oyuna 33 qol vuraraq şəxsi rekordunu yeniləyən və əcnəbilər arasında klub rekorduna da çox yaxınlaşan nigeriyalı qoleador digər tərəfdən İstanbul nəhənginə ciddi gəlir qazandırır. Klubun mağazaçılıq və pərakəndəçilik şöbəsi tərəfindən verilən məlumata əsasən fanatların Osimhenə aid atributlara böyük maraq göstərdiyi məlum olub.

Belə ki, indiyə qədər onun adına hazırlanan 230 min atribut (maska, köynək, forma və s.) satılıb. Rəhbərlik çempionluğun rəsmiləşməsinin ardından mövsümün sonuna qədər bu rəqəmin 400 minə çatacağını gözləyir! Sosial şəbəkələrdə isə ''Qalatasaray'' fanatları arasında əsil Osimhen çılğınlığı yaşanır. Belə ki, fanatlar bu futbolçunun komandada qalması üçün kampaniyaya başlayıblar. Son 24 saat ərzində #staywithusOsimhen (bizimlə qal Osimhen) heşteqi ilə 1 milyondan çox paylaşım edilib! Fanatların bu kampaniyası hətta Avropa mətbuatında da gündəm olub. Müqavilə ilə ''Napoli''yə məxsus olan və təzminatı 75 milyon avro olan nigeriyalının gələcək taleyi indi hər kəsə maraqlıdı.

''Qalatasaray'' hələ də onu daimi əsasda transfer edə biləcəyinə ümidini itirmir. Ən son xəbərlərdə istanbulluların neapollulara 66 milyon avro təklif etdiyi bildirilir. 9 milyon avro artıq ödənilib. ''Aslan'' Osimhenin özünə isə illik 13 milyon avro təklif edib. Yeni mövsümün planlaşdırılması məhz Osimhenin qalıb-qalmayacağından asılı olacaq.

Nigeriyalı karyerasını Türkiyədə davam etdirmək istəməsə, ''Qalatasaray'' İkardidən başqa daha iki tanınmış forvard transfer etmək niyyətindədi. Çünki komanda Çempionlar Liqasında da uğurlu çıxış etmək arzusundadı.