Bu yay transfer bazarında həm ''Fənərbaxça'' həm də ''Beşiktaş''dan geri qalan ''Qalatasaray'' əsil transfer bombasını partlatmağa müvəffəq oldu.

Belə ki, İstanbul nəhəngi ''Napoli''yə məxsus olan Viktor Osimhen ilə anlaşma əldə etdi. Müasir futbolun ən önəmli forvardlarından hesab olunan nigeriyalı bu gecə yerli vaxtla saat 03.20-də İstanbula gəldi. 25 yaşlı futbolçu Atatürk hava limanında fanatlar tərəfindən böyük coşqu və təzahüratlarla qarşılandı. Tibbi müayinədən sonra transferin detalları rəsmən açıqlanacaq.

Hələlik isə Türkiyə mətbuatının iddiasına görə iki klub arasındakı anlaşmaya əsasən ''Qalatasaray'' Osimhenin illik 11 milyon avroluq maaşını ödəmək öhdəliyini üzərinə götürüb. Yəni icarə haqqı nəzərdə tutulmayıb. ''Cim-Bom'' bu futbolçunu daimi əsasda transfer edə bilmək hüququnu da elə keçirməyib. Yəni 1 il tamamlandıdan sonra Osimhen ''Napoli''yə qayıdacaq. Qeyd edək ki, hazırki transfer dəyəri 100 milyon avro civarında olan və Neapol klubunun 2022/23-də qazandığı çempionluğunu əsas memarlarından olan Osimhen üçün bu yay çox hərəkətli keçdi. O, PSJ-yə keçməyə can atsa da, klublar anlaşa bilmədi. Çünki ''Napoli'' 120-130 milyon avro tələb etdi. Daha sonra bu məbləği ''Çelsi'' ödəməyə razı oldu. Amma bu dəfə də Osimhen prinsipə düşərək London klubuna keçməkdən imtina etdi. Transfer dönəminin bitməsinə az qalmış hər kəs onun Səudiyyə Ərəbistanına yollanacağını gözləyirdi. Amma futbolçu böyük pullar qazanmaq şansını baxmayaraq ora da yollanmaq istəmədi. Onun ''Napoli''yə qayıdışı da artıq mümkün deyildi. Çünki adı mövsümlük iştirak ərizəsinə salınmamışdı. Üstəlik Antonio Kontenin qərarı ilə Romelu Lukaku transfer edilmiş və Osimhenin geydiyi ''9'' nömrəli forma ona verilmişdi. ''Qalatasaray'' rəsmiləri yaranmış fürsətdən istifadə etdilər və bazar ertəsi təcili şəkildə İtaliyaya yollanaraq bu transferi tamamladılar.

Osimhenin iki əsas tələbi də yerinə yetirildi. Birincisi, böyük klubdan təklif alacağı təqdirdə onun yanvarda ''Qalatasaray''la müqaviləni birtərəfli qaydada ləğv etmək fürsəti olacaq. İkincisi, ''Napoli'' bu futbolçunun təzminatını 150 milyon avrodan 80 milyon avroya endirməyə razılıq verib. Peşəkar karyerasına ''Volfsburq''da başlayan Osimhen ''Şarlerua'', ''Lill'' və son olaraq ''Napoli''nin şərəfini qoruyub. O, 2020-dən bu yana neapolluların heyətində 133 rəsmi oyunda 76 qol, 18 məhsuldar ötürmə ilə fərqlənib.

ƏLİ