''Qalatasaray''ın ulduzu Viktor Osimhen son paylaşımı ilə diqqət çəkib.

''Football-plus.az'' xəbər verir ki, nigeriyalı forvard ''instaqram''da Türkiyəyə ilk dəfə ayaq basarkən ''Cim-Bom'' fanatlarının onu hava limanında qarşılanmasına dair çəkilən şəkilləri paylaşıb.

Osimhen zatən İstanbul nəhəngində icarə əsasında oynayır və onun qış fasiləsində ayrılacağı ilə bağlı çoxsaylı şayiələr dolaşır. Ünlü futbolçunun bu paylaşımı fanatlar arasında narahatlığa səbəb olub. Bəziləri bunu Osimhenin vidalaşmaq istəyi kimi qəbul edib. Amma çox güman Osimhen sadəcə geridə qalan ilin özü üçün ən yaddaqalan olaylarını paylaşıb. Onu da bildirək ki, 26 yaşlı ulduz forvard Türkiyə çempionatında yaranmış fasilədən istifadə edərək vətəni Nigeriyaya yollanmışdı. Ailəsi və yaxınları ilə vaxt keçirən Osimhen doğulduğu Laqos şəhərində yoxsulluq içində yaşayan ailələri yeməklə təmin edib.

Bundan başqa Osimhen şəhərdəki məktəblərin ibtidai siniflərində oxuyan bəzi şagirdlərə yeni il hədiyyələri göndərib və eləcə də futbola başladığı ''Olusosun Yunayted''in akademiyasını ziyarət edib. O, ''Qalatasaray''ın 160 formasını vətəninə apararaq Laqosda uşaqlara paylayıb.

Osimhenin ''sarı-qırmızılar''da bu mövsüm 15 rəsmi oyunda 12 qol, 5 məhsuldar ötürmə ilə fərqləndiyini bildirək.

ƏLİ