“Lids”in kapitanının “Qalatasaray” forması ilə nə əlaqəsi?
“Qalatasaray” forması premyer-liqanın debütantı “Lids”də ciddi böhrana səbəb olub. Məsələ burasındadı ki, “Lids”in uelsli müdafiəçisi və kapitanı Etan Ampadunun oğlunun “Qalatasaray forması ilə şəkilləri olduğu üzə çıxıb.
"Football-plus.az" xəbər verir ki, “Lids” fanatları bu şəkillərin üzə çıxmasının ardından sosial şəbəkələrdə od püskürüb. Onlar Ampadudan kapitanlığın alınmasını, eləcə də onun klubdan qovulmasını tələb ediblər.
Bir qədər stajlı fanatlar, yəqin ki, “Lidslə “Qalatasaray” arasındakı ədavətdən xəbərdardı. 2000-ci ildə bu komandaların yolu UEFA kubokunun yarımfinalında kəsişmişdi. Həmin vaxt iki ingiltərəli azarkeş – Kevin Speyt və Kristoer Loftus İstanbulda bıçaqlanaraq öldürülmüşdü. İndi fanatların fikrincə, 24 yaşlı futbolçu 25 il öncə dünyasını dəyişmiş iki azarkeşə münasibətdə böyük hörmətsizliyə yol verib. Etirazların artması üzündən “Lids” rəsmi bəyanat yaymalı olub. Klubun bəyanatında bunlar qeyd olunub:
“Etan partnyorundan bir neçə ay öncə ayrılıb və bu paylaşılan şəkillə heç bir əlaqəsi yoxdu. Etan Loftus və Speyt ailəsində baş vermiş faciədən xəbərdardı və mövzuya çox həssas yanaşır. “Lids” bu çətin dönəmdə Etanın şəxsi həyatına müdaxilə edilməməsini xahiş edir. Kapitanımız bu mövsüm həm meydanda, həm də ondan kənarda göstərdiyi liderlik keyfiyyətləri ilə kluba, tarixinə və bütün camiəyə olan bağlılığını ortaya qoyub. Etan “Lids”də hər kəsin dəstəyinə sahibdi”.
Sən demə, Etan Ampadunun uşağının anası və keçmiş sevgilisi olan Saara Sa adlı xanım əslən türk imiş. Onun övladına “Qalatasaray” forması geydirməsinin də səbəbi budu. “Lids”in yaydığı bəyanatın ardından bu xanım da öz növbəsində paylaşım edib:
“İstanbulda həyatını itirən iki nəfərin ailəsinə başsağlığı verirəm. Mən türkəm və oğlumuz da qismən türkdü. “Qalatasaray” ailə üzvlərimin uzun illərdi dəstəklədiyi klubdu. Biz uşağımızın valideynləriyik və Etan da bu şəkillərin çəkilməsnin fərqində idi. “Lids”dən xahiş edirəm ki, həqiqətə uyğun olmayan açıqlama verməsin və yanlış hekayə anlatmasın”.
Digər xəbərlər
