Qarşısına premyer-liqaya yüksəlmək hədəfi qoymasına baxmayaraq mövsümü çox zəif keçirən ''Hall Siti''ni bu gün növbəti çətin oyun gözləyir.

''Football-plus.az'' xəbər verir ki, türkiyəli şoumen Acun Ilıcalının sahibi olduğu komanda çempionşipin lideri ''Lids''i qəbul edəcək. Bu qarşılaşmadan öncə ''Hall Siti'' rəsmi bir bəyanatla fanatlara müraciət edib. Adətən fanatlar komandanın ev matçlarına Ilıcalıya dəstək əlaməti olaraq Türkiyə bayrağı və ya Türkiyə yığmasının forması ilə gəlirlər. Amma bu dəfə rəhbərlik fanatlardan stadiona Türkiyə bayrağı və forması ilə gəlməməyi xaiş edib.

Məsələ burasındadı ki, bu il ''Lids''in iki azarkeşinin İstanbulda öldürülməsi olayının üzərindən 25 il ötür. 2000-ci ilin aprelin 5-də bu komandalar UEFA kubokunun yarımfinalında üz-üzə gəlmişdilər. ''Lids''i dəstəkləmək üçün İstanbula gələn Kristofer Loftus ilə Kevin Speyt qarşılaşmadan bir gün öncə fanatlar arasında yaşanan münaqişə zamanı bıçaqlanaraq həyatını itirmişdi. Çempionşip matçlarında bəzən hətta elə olur ki, başqa klubun fanatları ''Lids''i cırnatmaq üçün stadiona Türkiyə bayrağı gətirirlər.

''Hall Siti'' yaydığı bəyanatla öz fanatlarından Kristofer Loftus və Kevin Speytin xatirəsinə hörmət əlaməti olaraq stadiona Türkiyə bayrağını, eləcə də Türkiyə yığmasının və ya bu ölkənin klublarının formalarını gətirməməyi xaiş edib.

ƏLİ