''Hall Siti'' fanatları nə üçün Əmrə Belözoğlunun təyinatını istəmir?
Acun Ilıcalının sahibi olduğu ''Hall Siti'' yenə ciddi dəyişikliklər astanasındadı.
''Football-plus.az'' az xəbər verir ki, bu komanda bu mövsüm yalnız top fərqi sayəsində çempionşipdə yerini qorumağı bacardı.
Mayın 15-də ''pələnglər'' baş məşqçi Ruben Selles ilə yolları ayırmağa üstünlük verdilər. Dekabrda bu vəzifəyə gələn ispaniyalı mütəxəssis son bir ildə ''Hall Siti''dən qovulan 3-cü çalışdırıcı oldu!
Acun Ilıcalı hələ ki, baş məşqçi baxımından sabitlik yaxalaya bilmir. Bu arada Əmrə Belözoğlunun klubun başına keçməyə namizədlərdən biri olduğu məlum olub. Bu xəbəri ''Hall Deyli Meyl'' nəşri yayıb. Digər namizədlər Miron Musliç, Qari O'Nil, Aleks Nil, Din Smit, Rob Edvards və Marti Sifuentesdi. Əmrə Belözoğlu hazırda ''Antalyaspor''u çalışdırır və onun klubla hələ birillik müqaviləsi var. Bu arada Əmrənin namizədlərdən biri olması ''Hall Siti'' fanatları arasında xoş qarşılanmayıb.
Məsələ burasındadı ki, Belözoğlu futbol oynadığı dönəmdə həm İngiltərədə, həm də Türkiyədə onun adı bir neçə dəfə irqçilikdə hallanıb. Acun Ilıcalı BBC-yə verdiyi açıqlamada bu mövzuya toxunaraq bunları deyib:
''Öncə bildirmək istəyirəm ki, Əmrə Belözoğlu bizim birinci namizədimiz deyil. O sadəcə namizədlərdən biridi. Bir neçə məşqçi arasında seçim edəcəyik. Təbii ki, fanatlarımızın fikrinə də hörmətlə yanaşırıq. Türkiyədə irqçilik yoxdu. Biz türklər heç irqçiliyin nə olduğunu da bilmirik. Bütün bunlardan savayı fanatlarımız nəyisə istəmirsə, bunu nəzərə alacağıq. Onları üzmək istəmərik''.
Daha öncə ''Fənərbaxça'', ''İstanbul BŞ'' və ''Ankaragücü''nü çalışdırmış 44 yaşlı Belözoğlu yanvardan ''Antalyaspor''un başındadı. Bu klub bu məşqçi ilə keçirdiyi 17 oyundan 6 qələbə, 4 heç-heçə, 7 məğlubiyyət ilə ayrılıb.
Digər xəbərlər
