“İstanbul BŞ”nin başında 2-ci mövsümünü tamamlamağa hazırlaşan Əmrə Belözoğlu ilə bağlı Türkiyə mətbuatında maraqlı xəbərlər yayılıb.

"Football-plus.az" xəbər verir ki, şayiələrə inansaq, gənc mütəxəssis gələn mövsüm İngiltərədə işləyəcək. Belə ki, Acun Ilıcalı onu sahibi olduğu klubun – “Hall Siti”nin başına gətirməyi planlaşdırır. Hətta deyilənə görə, tərəflər arasında artıq bütün vacib məsələlərdə razılıq əldə olunub. Ilıcalının “Hall Siti” ilə bağlı böyük planları olsa da, məşhur şoumen və iş adamı hələ ki bunları həyata keçirə bilmir. “Pələnglər” son mövsümü çox qarışıq və qeyri-sabit keçirərək çempionşipdə yalnız 15-ci yeri tutdu. Komandada bir neçə dəfə məşqçi dəyişikliyi baş verdi. Halbuki Acun mövsümün əvvəlində komandanı premyer-liqaya daşımaq istədiyini gizlətmirdi. Məşqçilik karyerasına 2021-ci ildə “Fənərbaxça”da başlayan Əmrə daha öncə verdiyi açıqlamalarda Avropada işləmək həvəsinin olduğunu bildirmişdi. Ilıcalı onun böyük pərəstişkarlarından biridi. Ona görə də bu təyinatın baş tutmaq ehtimalı heç də az deyil. Üstəlik İngiltərə Əmrə üçün yad ölkə deyil. Belözoğlu 2005-08-ci illərdə “Nyukasl”ın heyətində top qovub və bu klubda 80 rəsmi oyunda 6 qol, 11 məhsuldar ötürmə ilə fərqlənib. Bu mövsüm “İstanbul BŞ” onun başçılığı altında superliqada yalnız 5-ci pillədə qərarlaşsa da, Konfrans Liqasında 1/8 finala qədər irəliləməyi bacarmışdı. Bundan başqa, başakşəhərlilər kubokun finalına da vəsiqə qazanıb. Ümumilikdə İstanbul klubu Əmrənin başçılığı altında 79 rəsmi oyundan 42 qələbə, 17 heç-heçə, 20 məğlubiyyətlə ayrılıb ki, bu da orta hesabla hər oyuna 1,8 xal deməkdi.

Bu arada türkiyəli həmkarlarımız bir qədər də irəli gedərək hətta Əmrənin yerinə “İstanbul BŞ”yə gələcək məşqçinin adını da açıqlayıb. Söhbət Nuri Şahindən gedir. 34 yaşlı mütəxəssis, bilindiyi kimi, hazırda “Antalyaspor”u çalışdırır. Ötən il bir ara onun “Qalatasaray”a gəlmək ehtimalı da var idi. Amma bu təyinat baş tutmamışdı. “Antalyaspor” onun başçılığı altında ötən mövsüm diqqətçəkən nəticələr əldə edərək tarixinin yenilməzlik rekordunu yeniləmişdi. Amma bu mövsüm Antalya təmsilçisi zəif təsir bağışlayaraq qeyri-adi bir şeylə fərqlənmədi. Deyilənə görə, rəhbərlikdə tez-tez dəyişikliklərin baş verməsi Nuri Şahini çox da qane etmir. “İstanbul BŞ” bu baxımdan ideal klubdu. Hər halda, bu şayiələrin nə dərəcədə doğru olduğunu yaxın zamanlarda biləcəyik.