''Yuventus'' rəsmisi Osimhen ve Vlahoviç haqda nə dedi?
''Qalatasaray''da 38 oyuna 33 qol vuraraq çox parlaq mövsüm keçirən, amma müqavilə ilə ''Napoli''yə məxsus olan Viktor Osimhen ilə bağlı az qala hər gün yeni bir xəbər ortaya çıxır.
''Football-plus.az'' xəbər verir ki, onunla İngiltərə nəhəngləri, Səudiyyə Ərəbistanı klubları, eləcə də ''Yuventus'' ciddi şəkildə maraqlanır. Osimhenin 26 yaşda karyerasını məhv edərək pulu seçəcəyi və Səudiyyə Ərəbistanına yollanacağı inandırıcı görsənmir. O, karyerasını Avropada davam etdirmək istəyir.
Ortaya atılan son iddiaya görə Osimhen ''Yuventus''a keçməyə can atır. Guya o, yaxşı münasibətlərdə olduğu turinlilərin idman direktoru Kristian Cuntola ilə artıq ilkin razılıq əldə edib. Türkiyənin ''Bəyaz TV'' kanalı Cuntolanın özü ilə söhbətləşməyə müvəffəq olub. Funksioner eyni zamanda ''Fənər''in ciddi maraq dairəsində olan ''Yuve''nin serbiyalı forvardı Duşan Vlahoviçin durumu haqda da qısa açıqlama verib. İddialara görə ''Yuve'' məhz ''Fənər''ə yollanmaq ehtimalı olan Vlahoviçin boşluğunu Osimhen ilə doldurmaq istəyir. Amma Cuntola bu şayiələri təkzib edib:
''Bu xəbərlərin hardan çıxdığını bilmirəm. Biz Osimheni istəmirik. Mətbuat təzyiq qurmaq üçün belə şeyləri ortaya atır. Biz onunla maraqlanmırıq. Vlahoviçə gəlincə, onun ''Yuventus''da qalıb-qalmayacağını bilmirəm. Onunla bağlı bütün qərarları mövsüm bitdikdən sonra verəcəyik. ''Fənərbaxça''nın ona maraq göstərib-göstərmədiyini bilmirəm. Onların heç bir rəsmisi ilə indiyə qədər danışıqlar aparmamışam''.
Digər xəbərlər
