Mövsüm sona yaxınlaşdıqca gələcək taleyi hələ də qeyri-müəyyən olan Viktor Osimhen uğrunda belə desək, yarış qızışır.

''Football-plus.az'' xəbər verir ki, ''Qalatasaray''da ''torba-torba'' qollar vuran nigeriyalı forvard böyük ehtimalla Türkiyə macerasının son aylarını yaşayır. Çünki o, müqavilə ilə ''Napoli''yə məxsusdu və sərbəst qalma maddəsi 75 milyon avrodu. Hərçənd ''Mançester Yunayted'', ''Arsenal'', ''Barselona'' və ''Yuventus'' kimi nəhənglərlə yanaşı ''Qalatasaray'' özü də onu daimi əsasda transfer etməyə cəhd göstərir.

Bu arada 26 yaşlı forvardla bağlı yeni sürpriz iddia ortaya atılıb. İtaliyalı jurnalist Nikola Skiranın paylaşdığı xəbərə görə ''Napoli'' Osimhenin transferi ilə bağlı Səudiyyə Ərəbistanı nəhəngi ''Əl-Hilal'' ilə razılıq əldə edib!

Mənbənin məlumatına görə ərəblər Osimhenə Avropa standartlarının çox üzərində olan bir maaş təklif edib. Ancaq klublar arasında anlaşmaya baxmayaraq son qərarı futbolçu özü verəcək. Osimhen isə karyerasını Avropada davam etdirmək arzusundadı. Ancaq ona astronomik məbləğdə maaş təklif olunduğunu nəzərə alsaq, nigeriyalının hələ ki, ''Əl-Hilal'' üçün qapıları birdəfəlik bağlamadığı deyilir. Hələlik bütün diqqətini ''Qalatasaray''la çempion olmağa yönəldən Osimhen yekun qərarını mövsümün sonunda verəcək.

Qeyd edək ki, bu futbolçu bu mövsüm ''sarı-qırmızılar''ın heyətində 36 rəsmi oyuna 31 qol vurub. O, daha bir dəfə fərqlənəcəyi təqdirdə karyerasının ən məhsuldar mövsümünü keçirmiş olacaq. 4 dəfə fərqlənəcəyi təqdirdə isə adını klub tarixinə yazdıraraq ''Qalatasaray''da bir mövsümə ən çox qol vuran əcnəbi futbolçuya çevriləcək!

Hazırda bu rekord 2000/01-də 43 oyuna 34 qol vuran Mario Jardelə məxsusdu. Mauro İkardi ilə Bafetimbi Qomis isə hərəyə 32 qolla 2-3-cü pillələri bölüşdürürlər.