''Fənərbaxça'' onsuz da ulduzlarla dolu olan heyətinə daha bir ulduz futbolçunu cəlb etmək istəyir.

Söhbət Duşan Vlahoviçdən gedir. İstanbul nəhəngi neçə müddətdi, diqqət mərkəzində saxladığı tanınmış forvard üçün real addımlar atmağa hazırlaşır. ''Yuventus''da bu mövsüm Tyaqo Motta ilə ulduzu barışmayan, Kolo Muaninin gəlişindən sonra əsas heyətdəki yerini itirən təcrübəli futbolçu İqor Tudorun gəlişindən sonra daha çox oynamağa başlayıb. Amma İtaliya mətbuatının iddiasına görə Vlahoviç mövsümün sonunda birmənalı şəkildə Turin nəhəngindən ayrılmaq qərarına gəlib.

''Fənərbaxça''da Edin Ceko ilə Yussef Ən-Nəsirinin gələn mövsüm komandada olub-olmayacağı bilinmir. Cekonun artıq 39 yaşı var. Ən-Nəsiri isə pis məhsuldarlıq sərgiləməsə də, onun Səudiyyə Ərəbistanı klublarından birinə satılacağı istisna edilmir. İddialara görə ''Fənərbaxça'' başqanı Əli Koçun bir nömrəli hədəfi Vlahoviçdi. ''Yuventus''un serbiyalı ulduza görə nə qədər pul tələb edəcəyi bilinmir. Transfer dəyəri 45 milyon avro civarında olan Vlahoviç gələn il ''Yuve'' ilə müqaviləsinin son mövsümünə qədəm qoyacaq. Onun klubla 2026-nın yayına qədər müqaviləsi var. Ona görə də ''qoca sinyora''nın o qədər böyük məbləğ tələb edəcəyi gözlənilmir. ''Fənər'' rəsmiləri artıq danışıqlara başlamaq və Duşan Tadiçi də bu işə qoşmaq niyyətindədilər.

Serbiya yığmasından bir-birini gözəl tanıyan Tadiç ilə Vlahoviç yaxın dostdu. Üstəlik ''sarı-lacivərdlilər''də daha bir serbiyalı - Kostiç də çıxış edir. Ancaq ''Fənər''in işi asan olmayacaq. Çünki ''Aston Villa'' başda olmaqla premyer-liqa klubları da Vlahoviçə ciddi maraq göstərir.

25 yaşlı futbolçu bu mövsüm ''Yuventus''un heyətində 36 rəsmi oyunda forma geyərək aktivinə 14 qol, 3 məhsuldar ötürmə yazıb.