''Eyüpspor''u tarixində ilk dəfə elitaya yüksəldən və mövsümün geridə qalan hissəsində uğurlu nəticələr əldə edən Arda Turanla bağlı Türkiyə mətbuatında maraqlı iddia ortaya atılıb.

Belə ki, ''İstanbul BŞ''nin Çağdaş Atanla yollarını ayırmaq və onun yerinə məhz Ardanı gətirmək istədiyi deyilir. ''İstanbul BŞ'' mövsümə yaxşı başlayaraq Konfrans Liqasının qrup mərhələsinə vəsiqə qazansa da, komanda son vaxtlar heç cür böhrandan çıxa bilmir.

Başakşəhərlilərin superliqada son 7 turda cəmi 1 qələbəsi var. KL-də isə komanda 3 tura cəmi 1 xal toplayıb. Son 8 rəsmi oyundan 4 heç-heçə, 4 məğlubiyyətlə ayrılan ''İstanbul BŞ'' son qələbəsini sentyabrda qazanıb. Ona görə də Çağdaş Atanın ''kreslosunun'' laxlaması başadüşüləndi. ''İstanbul BŞ'' Arda üçün heç də yad komanda deyil. O futbolçu kimi 2018-in yanvarından 2020-nin yanvarına qədər bu klubun şərəfini qoruyub. İddialara görə bu kluba vəfa borcunun olduğunu söyləyən Turan rəsmi təklif gələcəyi təqdirdə qəbul etməyə hazırdı. Ardanın ''Eyüpspor''u hazırda 12 oyuna topladığı 22 xalla turnir cədvəlində 4-cü pillədə qərarlaşıb. ''İstanbul BŞ'' isə 11 oyuna topladığı 16 xalla 8-ci pillədədi.

ƏLİ