Arda Gülər uğrunda ''El Klasiko'' davam edir
Avropa nəhəngləri ''Fənərbaxça'' və Türkiyə yığmasının gənc ulduzu Arda Gülər uğrunda mübarizə aparmaqda davam edir.
"Football-plus.az" xəbər verir ki, ''Real''ın ardından ''Barselona'' da ciddi şəkildə mübarizəyə qoşulub. ''Milan'' da 18 yaşlı yarımmüdafiəçini heyətində görmək arzusundadı. Kataloniyalıların prezidenti Xuan Laporta son açıqlamasında komandanın yeni idman direktoru Dekunun Arda ilə bağlı danışıqlar üçün Türkiyəyə yollandığını bildirib:
''Deku hazırda İstanbuldadı. Arda Gülərin transferini bitirməyə çalışır. La Liqa bizə bu il rahat transfer əməliyyatları keçirməyə imkan verir. Bu ilki transferlərə xərclənən məbləğ gələn il üçün nəzərə alınacaq. Skaut departamentimiz uzun müddətdi, Ardanı izləyir. Çox yaxşı oyunçudu və strateji cəhətdən bizim üçün mühüm transferdi. Dekunun da onunla bağlı planları var''.
Amma ''Real'' kimi ''Barsa'' da Ardaya daimi oyun praktikası ilə bağlı zəmanət verə bilmir. Gənc oyunçu isə məhz daimi oyun praktikasına malik olmaq istəyir. Ona görə də ''Barsa''nın da eynilə ''Real'' kimi bu transferi həyata keçirəcəyi təqdirdə ilk mövsümdə Güləri ''Fənərbaxça''nın özünə birillik icarəyə verəcəyi gözlənilir.
Xatırladaq ki, Arda Gülər geridə qoyduğumuz mövsüm İstanbul nəhəngində 35 rəsmi oyuna çıxaraq 6 qol, 7 məhsuldar ötürməlik performans sərgiləyib.
Digər xəbərlər
