Mayın ilk günündə Avropa Liqasının (AL) yarımfinalına start verildi.

"Football-plus.az" xəbər verir ki, ilk matçlarda inamlı qələbələr qazanan İngiltərə klubları finala çıxmaq üçün əla şans qazandılar.

yarımfinal, ilk oyunlar
Atletik (İspaniya) - Mançester Yunayted (İngiltərə) 0:3
Kazemiro, 30. B.Fernandeş, 37-p.; 45.
Atletik: Aqirresabala, De Markos (Qorosabel, 42), Vivian, Yeray, Berçiçe, De Qalarreta (Prados, 46), Xaureqisar, Berenger (A.Paredes, 42), İ.Uilyams (Calo, 87), N.Uilyams (U.Qomes, 79), Sannadi.
Mançester Yunayted: Onana, Yoro, Maquayr (De Liqt, 65), Lindelöff, Mazraui (Şou, 74), Uqarte (Maunt, 65), Kazemiro, Dorqu (Diallo, 84), B.Fernandeş, Qarnaço (Maynu, 84), Heylunn.
Liqa mərhələsini “Latsio” ilə birgə 19 xalla şərikli lider kimi başa vuran “Atletik”in doğma meydanında keçiriləcək finalda oynamaq şansı kifayət qədər yüksək dəyərləndirilirdi. İlk baxışdan Ernesto Valverdenin komandasının İngiltərə daxilində olduqca zəif nəticələr göstərən “Mançester Yunayted”i iki oyunun nəticəsinə əsasən mübarizədən kənarlaşdıracağı sensasiya sayılmayacaqdı. Amma bu da var ki, AL-in liqa mərhələsində 18 xalla 3-cü yeri tutan mançesterlilər turnirdəki hər oyuna az qala final gözü ilə baxırlar. Ruben Amorimin komandasının Çempionlar Liqasına vəsiqə qazanmaq üçün yeganə çıxış yolu məhz AL-də qələbədi.

İnanılmazdı, amma “Yunayted” Bilbaoda üç cavabsız qol vurmaqla, necə deyərlər, finalın qapısını açdı. Bu nəticəyə təsir edən amillərin sırasında mançesterlilərin turnirdə qalib gəlmək üçün var gücünü meydanda sərf etdiklərini ilk növbədə vurğulamalıyıq. “San Mames”dəki gözlənilməz hesaba şərait yaradan digər fakt isə ev sahiblərinin 35-ci dəqiqədən sona qədər on nəfərlə oynaması oldu. Doğrudu, qonaqların yarımmüdafiəçisi Kazemiro 5 dəqiqə əvvəl hesabı açmışdı. MY-nin qapıya yönələn ilk dəqiq zərbəsinin qolla nəticələnməsi sanki ev sahiblərini əsəbiləşdirdi.

Çox keçmədən Vivian cərimə meydançasında Heylunna qarşı kobudluğuna görə qarşısında birbaşa qırmızı vərəqə gördü. Fernandeş isə penalti ilə fərqi iki topa çatdırdı. Valverdenin hələ fasilə ərəfəsində iki əvəzləməyə əl atması komandasının oyununu gücləndirmədi. Əksinə, qonaqların lideri Fernandeş qapıçı ilə təkbətək qaldığı epizodu da qola çevirdi. Bilbaolular ikinci hissədə oyunda dönüş yaratmaq bir yana, heç təsəlli qolunu da vura bilmədilər. MY isə seriyasını 13 oyuna çatdırdı: İngiltərə nəhəngi cari mövsümdə AL-də 8 qələbə qazanıb, 5 matçı isə heç-heçə başa vurub.
Amorimin ser Aleks Ferqyusonun ilk avrokubok mövsümündəki yolu ilə getdiyini də vurğulayaq: portuqaliyalı mütəxəssis baş məşqçi postuna təyinat alandan sonra komanda avrokubokda keçirdiyi 9 oyunda məğlub olmayıb (7 qələbə, 2 heç-heçə).

Tottenhem (İngiltərə) - Bude/Qlimt (Norveç) 3:1
Conson, 1. Meddison, 34. Solanke, 61-p. – Saltnes, 83.
Tottenhem: Vikario, Porro, Romero, Van de Veen, Udoci, Bentankur, Bissuma, Conson, Meddison (Kulusevski, 65), Rişarlison (Tel, 46), Solanke (Odober, 75).
Bude/Qlimt: Xaykin, Şevold, Qunnersen, Nilsen (Moe, 46), Byorkan, Brunstad Fet (Yensen, 77), Hauqe, Saltnes, Myaattya (Euklenn, 65), Blomberq (Sörli, 77), Hög.

“Qarabağ”ın vahid liqa mərhələsində Norveçdə 2:1 hesabıyla məğlub etdiyi “Bude/Qlimt”in avrokuboklarda ilk dəfə yarımfinala çıxması cari mövsümün ən diqqətəlayiq faktları sırasındadı. Kyetil Knutsenin komandası üçün bu mərhələnin ilk oyununun çətin keçəcəyi gözlənilirdi. Çünki “Tottenhem” üçün də AL-də qələbə mövsümün qalan hissəsində ən vacib hədəfdi. İngiltərə daxilindəki yarışları boşa, yeri gələndə yola verən londonlular da ÇL-ə vəsiqə üçün avrokubokda qələbə qazanmağa çalışırlar.

Onlar ev oyununu böyük motivasiya ilə keçirərək ilk dəqiqədəcə hesabı açdılar: 37-ci saniyədə qapıya yol tapan Conson AL-in yarımfinalında vurulan ən erkən qolun müəllifi oldu. Fasilə ərəfəsində Meddison, ikinci hissədə isə Solanke komandasının üstünlüyünü darmadağın həddinə çatdırdılar. Lakin Saltnes sona yaxın fərqi azaltmaqla mayın 8-də keçiriləcək cavab oyununda “Bude/Qlimt” üçün ümid yeri qoydu.

Bombardirlər: B.Fernandeş (Mançester Yunayted), Hög (Bude/Qlimt), Əl-Kaabi (Olimpiakos) - 7, Varqa (Ferentsvaroş), Omorodion (Portu), Osimhen (Qalatasaray), Fofana (Lion), Çernı (Reyncers), Ən-Nəsiri (Fənərbaxça) - 6.